Trepça ’89 nga Mitrovica arkëtoi tri pikë të rëndësishme, duke thelluar edhe më shumë epërsinë në krye të renditjes ndaj rivalëve të tjerë. Trepça ’89 para shikuesve të vet e mposhti me rezultat 4:0 Drenicën nga Skenderaj, në ndeshjen e javës së 18-të të elitës së futbollit. Mitrovicasit patën një mori raste dhe fitorja ka mundur të jetë edhe më thellë. Në minutën e 43-të, mbrojtësi Përparim Islami kaloi në epërsi ekipin e tij. Në pjesën e dytë pikërisht më minutën e 65-të, Florent Hasani thellon epërsinë në 2:0. Futbollisti Fiton Hajdari realizoi dy herë në fund pikërisht në minutën e 88-të dhe në atë të 90-tën për fitoren 4:0. ’89-shi që udhëhiqet nga kryetrajneri Zekirja Ramadani kryeson renditjen me 42 pikë, ka gjashtë më shumë se Feronikeli, Prishtina dhe Llapi, kurse Drenica është në pozitën e 8-të me 19 sosh.
