Bundesliga rikthehet me të njejtin skenar, Bayernin e Mynihut në fron që çel sezonin me një fitore deri diku të lehtë ndaj Bayer Leverkusen në “Allianz Arena”. “Aspirinat” u dorëzuan 3-1 ndaj të besuarve të Carlo Ancelottit në premierën e sezonit të ri të futbollit gjerman ku u luajt një muzikë e njohur, ajo e Bayernit të Mynihut në formatin e skuadrës së frikshme. Ishte i riu Niklas Suele njeriu i golit të parë sezonal. Në minutën e 9, qëndërmbrojtësi i blerë gjatë merkatos së verës nga Hoffenheim, kampi në avantazh vendasit të mbështetur nga rreth 70 mijë tifozë të pranishëm në stadiumin bavarez. Një tjetër debutues dhe blerje e merkatos së verës la shenjën e tij pak minuta më vonë.
Corentin Tolisso sigloi rrjetën e dytë 10 minuta më vonë duke i dhënë një drejtim pa kthim ndeshjes. Bayer Leverkusen humbi edhe më shumë terren, duke u kujdesur për të mos e kthyer në një natë turpi ndeshjen e parë të sezonit. Robert Leëandoëski shënoi emrin e tij në listën e golashënuesve në minutën e 53 teksa transformoi në gol një 11-metërsh që vulosi përfundimisht fitoren e Bayernit të Mynihut.
Në krahun tjetër, Admir Mehmedi mbajti lart nderin e “Aspirinave” me një realizim personal 25 minuta nga fundi, por të pamjaftueshëm për të rikthyer në lojë ekipin e Heiko Herrlich. Një ndeshje që dhuroi jo pak emocione duke çelur kapitullin e një rrugëtimi të gjatë që do të përfundojë në muajin Maj të vitit të ardhshëm. Supersport përcolli emocionet e kësaj sfide dhe një gjë të tillë do të vazhdojë ta bëjë gjatë 3 viteve në vazhdim pasi ndeshjet e Kampionatit Gjerman do të transmetohen live dhe ekskluzivisht në paketën sportive të Digitald në kanalin Eurosport 2, kanalin numër 99 të paketës satelitore dhe 95 në atë tokësore.
