U21 e Kosovës ka shënuar një fitore të rëndësishme në kualifikimet për Euro 2019.
Reshjet e borës e po ashtu moti i ftoftë, nuk i ka penguar djelmoshat e trajnerit Rafet Prekazi për të realizuar një paraqitje të mirë në stadiumin ‘Adem Jashari’, ku mposhtën 2:0 kombëtaren e Azerbajxhanit.
Pjesa e parë, u dominua në tërësi nga skuadra e Kosovës, që përmes Sulejmanit e Hasanit, arriti të krijojë disa raste të mira, por pa arritur të gjejnë rrjetën.
Po aq e mirë, ishte edhe në pjesën e dytë Kosova, por kjo paraqitje u bë më kuptimplote me dy gola të shënuara, që kishin rëndësinë e tre pikëve.
Luhej minuta e 54’ kur një aksion të bukur të Kosovës, e shndërroi në gol Florent Hasani, që ndezi atmosferën te ‘Dardanët’, që përkundër të ftohti nuk e ndalën për asnjë moment mbështetjen.
Pak minuta më vonë, Kosova shënoi edhe golin e dytë, përmes mbrojtësi Kolgeci, që kërcejë më së larti në zonën e mysafirëve për 2:0.
Me këtë fitore Kosova renditet në vendin e tretë me 10 pikë në grupin e pestë, aq pikë ka edhe Irlanda e vendit të dytë.
Edhe ndeshjen e ardhshme Kosova e zhvillon në Mitrovicë, tani kundër Gjermanisë.
