Arsenal po shënon një sezon të dobët, më të dobëtin prej ardhjes të Arsene Wenger dhe fajtorët po kërkohen gjithandej skuadrës, nga trajneri e deri tek lojtarët.
“Topçinjtë” gjenden në pozitën e gjashtë në Premier League, çka do të thotë se mund të mbesin pa garat e UEFA-s, nëse nuk triumfojnë në Europa League sivjet.
Era e profesorit Arsene Wenger duket se po përfundon, por bashkë me të mund të largohen edhe dy shqiptarët, që po shihen si dështime nga shtypi, e posaçërisht Mustafi me paraqitjet e tij tash e një kohë.
Të dy arritën në “Emirates” në verën e vitit 2016 dhe pritej se pikërisht ata do të ishin ndër faktorët kryesorë për ndryshime pozitive tek Arsenal, por duket se kanë dështuar të impresionojnë.
Shkodran Mustafi u shndërrua në mbrojtësin e tetë më të shtrenjtë në botë, pasi Arsenal mendoi se vlente shumë dhe pagoi për të 35 milionë funte kur e transferoi nga Valencia.
Kurse, Granit Xhaka në anën tjetër i cili ishte tek Borussia Monchengladbach, u transferua për 34 milionë funte, duke u bërë blerja e gjashtë më e shtrenjtë e “Topçinjve” nga Londra.
Megjithatë, dyshja nuk arriti të përmbush pritshmërinë e tifozëve dhe klubit nga Londra Veriore, kurse gjatë verës pritet që Arsenal do të “peshkojë” emra tjerë, të cilët do të mund t’i zëvendësonin dy shqiptarët.
