Karakteri i Asociacionit të Komunave me shumicë serbe në Kosovë ishte një zgjidhje klasike afatshkurtër e Bashkimit Evropian (BE) që kishte për synim arritjen e çfarëdo kompromisi të realizueshëm, pa pasur parasysh implikimet negative në aspektin afatgjatë për demokracinë dhe sundimin e ligjit në Kosovë.
Kështu thuhet në raportin e Këshillit për Politika të Demokratizimit, me seli në Berlin të Gjermanisë, të përgatitur nga autori Bodo Weber.
Në raportin e këtij Këshilli të përgatitur gjatë këtij muaji, po ashtu, përmendet se “sipas një zyrtari të Bashkimit Evropian, drafti i dokumentit i Asociacionit i cili shërbeu si bazë për negocim në Bruksel ishte hartuar nga një jurist i Shërbimit të Jashtëm të BE-së (EEAS), i cili nuk kishte fare përvojë në fushën e qeverisjes lokale”.
“Situata bëhet edhe më e komplikuar kur t’i shtohet fakti se teksti në gjuhën shqipe dhe serbe dallon nga teksti në gjuhën angleze. Prandaj, është e qartë se forma dhe karakteri i Asociacionit do të varet nga përmbajtja e statutit të tij”, thuhet mes tjerash në këtë raport me titull: “Zhbërja e progresit? – Këmbimi i demokracisë me zgjidhjen e mosmarrëveshjeve rreth statusit”.
