Kryeministri i Kosovës, Ramush Haradinaj, priti sot në takim nënkryetarin e Komunës së Gjilanit, Rexhep Kadriu, i cili prezantoi prioritetet e Komunës së Gjilanit të cilat kërkojnë zgjidhje urgjente.
Fillimisht nënkryetari Kadriu e përgëzoi kryeministrin Haradinaj për marrjen e detyrës së re në krye të ekzekutivit të vendit, duke shprehur bindjen se qeverisja Haradinaj do të gjejë zgjidhje për problemet që i rëndojnë qytetarët e Komunës së Gjilanit.
Gjatë takimit, u bisedua për fillimin e Autostradës Prishtinë-Gjilan-Dheu i Bardhë, si nyje shumë e rëndësishme që do të ndihmonte në qarkullimin më të lehtë të njerëzve dhe mallrave. Kryeministri Haradinaj theksoi rëndësinë e zbatimit të Marrëveshjes me Bankën Evropiane për Rindërtim dhe Zhvillim (BERZH) për zgjerimin e rrugëve Prishtinë-Gjilan dhe asaj Gjilan-Kllokot.
