Kelmendi: Ka hedhur poshtë shkrimet se babai i tij ndodhet në Dubai

Liridon Kelmendi, djali i Naser Kelmendit, ka hedhur poshtë shkrimet në media se babai i tij ndodhet në Dubai, në vilën e tij, ku po merret në pyetje nga hetues amerikanë. Ai ka thënë se të gjitha janë të pavërteta. Pranon se me babain e tij nuk ka kontaktuar tash e një javë.

Krejt çfarë kanë shkruar mediat malazeze dhe boshnjake për Naser Kelmendin, i ka hedhur poshtë djali i tij, Liridon Kelmendi.

Ai të shtunën ka thënë se babai i tij nuk ndodhet në Dubai, në vilën e tij dhe se nuk ka bërë kurrfarë marrëveshjesh me hetues amerikanë.

“ Të gjitha që janë thënë janë të pavërteta. Janë shpifje të atyre mediave”, ka thënë të shtunën për gazetë, djali i Naser Kelmendit.

Ai ka pranuar se ka një javë që nuk kanë folur ose kontaktuar me babain e tij.

Mediat malazeze raportojnë se Naser Kelmendi, i akuzuar nga Bosnja për korrupsion dhe shpërndarje të drogës, ndodhet në arrest shtëpiak në vilën e tij në Dubai, nën mbikëqyrje të hetuesve amerikanë.

Njeriun të cilin kohë më parë SHBA-ja e vendosi në listën e zezë, ndodhet në duart e hetuesve amerikanë, shkruan e përjavshmja malazeze “Monitor”.

“Hetuesit amerikanë kanë bërë një marrëveshje me narkobosin Naser Kelmendi duke i lejuar atij liri të kufizuar në këmbim për bashkëpunim dhe informacione që do të marrin nga ai. Sipas informatave që kemi, mbreti ballkanik i heroinës e ka pranuar marrëveshjen, dhe tashmë ndodhet larg Ballkanit, në vendin që për të është shumë më i sigurt në krahasim në rajonin nga i cili u largua. Lokacioni i tij tash është Lindja e Afërt”, thekson “Monitor”.