Numri i rasteve të ngacmimeve, sulmeve e dhunës seksuale në vendin tonë ka marrë përmasa shqetësuese. Në shumë prej tyre, viktima janë vajzat e mitura, ndërsa shpesh të dyshuar, janë persona të moshës madhore, të cilët përkundër moshës minorene të viktimave, i keqpërdorin seksualisht.
Një rast i rëndë ka ndodhur në Kaçanik, ku një vajzë e mitur dyshohet se është dhunuar seksualisht dhe e njëjta më pas ka mbetur e mbyllur në një banesë.
Burimet brenda Prokurorisë kanë bërë me dije se mëngjesin e sotëm, e mitura është gjetur e ngujuar në një banesë. Njësitë policore kanë intervenuar në vendin e ngjarjes, ku me anë të përdorimit të forcës kanë arritur që të depërtojnë brenda hapësirës ku ndodhej vajza dhe e njëjta është nxjerrë jashtë.
E mitura është shoqëruar në stacion policor, ku ka dhënë dëshminë e saj lidhur me rastin.
Sipas informacioneve të cilat posedon Sinjali, 15-vjeçarja ka deklaruar se ka qenë e mbyllur në atë banesë që nga mbrëmë, pasi ishte takuar me një person të moshës madhore, e me të cilin dyshohet se ka kryer edhe marrëdhënie seksuale me pëlqimin e saj.
22-vjeçari është shoqëruar po ashtu në Polici, ku gjatë intervistimit nga hetuesit policorë ka deklaruar se me të miturën janë takuar në orët e para të mëngjesit dhe më pas me pëlqimin e të dyve kanë vazhduar në banesën në fjalë, ku kanë kryer marrëdhënie seksuale.
Bazuar në dëshminë e të dyshuarit, ai e ka kyçur me çelës banesën ku ndodhej e mitura me kërkesën e saj, pasi sipas tij, ajo donte të pushonte.
Pas përfundimit të procedurave policore, Prokurori i Shtetit ka nxjerrë aktvendim që të dyshuarit t’i caktohet masa e ndalimit policor nën dyshimet për kryerjen e veprave penale ‘Dhunim’ dhe ‘Privim i kundërligjshëm nga liria’.
Kujtojmë që sipas Kodit Penal të Republikës së Kosovës, personat që kryejnë marrëdhënie seksuale me persona që janë nën moshën 16-vjeçare, kryejnë vepër penale dhe mund të dënohen me burgim prej 5 deri në 20 vjet.
