Gjykata e Fierit ka vendosur “arrest me burg” për Shpëtim Goxhajn, i cili masakroi gruan 7 herë me thikë në sy të fëmijës 11 vjeç mbrëmjen e 24 korrikut.
Viktima është Resmije Goxhaj 50-vjeç, e cila ka gjetur vdekjen e menjëhershme nga goditjet e marra.
55-vjeçari kishte deklaruar se nuk kishte pasur qellim ta vriste gruan, por ishte nervozuar dhe nuk e kishte kontrolluar dot veten.
Sipas tij gjithçka nisi pas një debati për shkak të xhelozisë ndaj të shoqes, pasi kishte dyshime se ajo e tradhtonte.
“Kur nisëm të debatonim ishim vetëm në banesë, pasi dy fëmijët e mëdhenj kishin shkuar në një gëzim familjar, në një dasmë te të afërmit tanë. I vogli flinte. U grindëm me fjalë. Teksa po debatonim, ajo më qëlloi e para. Më pas, edhe unë e godita me thikë. Kur pashë se çfarë ndodhi dhe gruan ashtu të përgjakur, u trondita. Më pas, nuk mbaj mend më asgjë, madje as momentin kur policia erdhi dhe më arrestoi. Nuk doja ta vrisja nënën e fëmijëve të mi. Jam penduar”, është shprehur Goxhaj për grupin hetimor.