Një shtetas turk është prangosur ditën e sotme në qytetin e Vlorës, pasi ishte shpallur në kërkim ndërkombëtar nga autoritet turke.
Mësohet se në prangat e uniformave blu të qytetit bregdetar është vënë 47-vjeçari, Yuksel Uzer.
Për 47-vjeçarin, autoritetet e Drejtësisë Turke kishin lëshuar një Urdhër-Arresti Ndërkombëtar, pasi në 2008, Gjykata e Shkallës së Parë në Karapinar Turqi, e ka dënuar këtë me 2 vite e 6 muaj burg, për kryerjen e veprës penale të ushtrimit të profesionit të dentistit pa patur dokument Diplomimi (brenda shtetit Turk).
Burime nga policia e Vlorës bëjnë me dije për Gazeta Express se Uzeri kishte mbi 5 vjet qe jetonte në Vlorë, ku rrinte i fshehur për të mos u kapur nga policia.
Po ashtu, të njëjta burime saktësojnë se ai jetonte tek djali i tij, i cili ka një klinikë dentare private në Vlorë.
Për këtë rast, policia thotë se materialet ja ka kaluar prokurorisë së Rrethit Gjyqësor Vlorë për veprime të mëtejshme.