Policia e Elbasanit ka bërë të mundur zbardhjen e plagosjes së ndodhur ditën e djeshme në këtë qytet.
Siç bëhet e ditur nga blutë e Elbasanit, për ngjarjen në fjalë janë shpallur në kërkim E.GJ, 40 vjeç, M.B, 35 vjeç dhe F.L, 27 vjeç, të tre banues në Elbasan.
Personat e mësipërm, ditën e djeshme në Lagjen “Aqif Pasha” përballë Gjykatës së Rrethit Gjyqësor Elbasan, në bashkëpunim me njëri – tjetrin dyshohen të kenë plagosur me pistoletë në shpatull D.P (K), 38 vjeç banues në Elbasan, i cili ndodhet në spitalin Kirurgjik Elbasan jashtë rrezikut për jetën.
Grupi hetimor gjeti dhe sekuestroi në cilësinë e provës materiale:
1 gëzhojë armë zjarri model 54 dhe një predhë të kalibrit 7.62 mm
Materialet i kaluan Prokurorisë së Rrethit Gjyqësor Elbasan për veprime të mëtejshme për veprën penale "Vrasje me paramendim e mbetur në tentativë, kryer në bashkëpunim” dhe “Prodhimi dhe mbajtja pa leje e armëve luftarake dhe e municionit”.