Dy meshkuj dhe një femër të moshave nga 24 deri 35 vjeç janë arrestuar nga Policia dhe FNSH në lokalin e natës "New York" në Fier. Policia ka mësyrë befasisht gjatë feste që po zhvillohej aty pas dyshimeve se do në të do të shitej kokainë. Si rezultat, ka kapur në dhomën e tyre private dy administratorët e lokalit, që e kishin kthyer atë në një bazë shitjeje kokaine si dhe një 27-vjeçare, e cila fshihte në çantë dy thika.
Kësisoj, gjatë operacionit të koduar ”Mesnata” u arrestuan:
1.Shkëlzen Gjata, 24 vjeç, banues në Drizë, Fier.
2.Mariglen (Renato) Mellaraj, 35 vjeç, banues në Fier.
3.Pranvera Isufaj, 27 vjeçe, banuese në Fier.
Policia njoftoi se arrestimi i tyre u bë i mundur mbi bazën e informacioneve të mara më parë në rrugë operative se në lokalin ”New York” në lagjen “Apollonia” Fier gjatë një feste ”Party” që do të zhvillohej aty do të shitej lëndë narkotike.
Mbi bazën e këtij informacioni, është organizuar puna dhe në bashkëpunim me FNSH Fier, gjatë mesnatës, është shkuar në lokalin ”New York” dhe është ushtruar kontroll personave dhe ambienteve të këtij lokali që ishte në administrim nga shtetasit Shkëlzen Gjata dhe Mariglen Mellaraj.
Nga kontrolli i ushtruar në një dhomë me mbishkrimin ”Private” u gjendën dhe u sekuestruan në cilësinë e provës materiale 36 copë paketime me kokainë, një peshore elektronike, një palë gërshërë, një fletore shënimesh etj
Gjatë kohës së kontrollit fizik të personave që ishin në këtë lokal dhe më konkretisht të Pranvera Isufajt, në çantën e saj të krahut janë gjetur dhe sekuestruar në cilësinë e provës materiale 2 thika me teh të përkulshëm të dyshuara si armë të ftohta. Po kështu Isufaj ka kundërshtuar hapur veprimet e policisë duke përdorur dhe forcën me veprime aktive e për pasojë ka penguar në kryerjen e detyrës punonjësit e policisë si dhe i ka ofenduar ata.
Materialet proceduriale i kaluan Prokurorisë pranë Gjykatës së Shkallës së Parë Fier, në ngarkim të shtetasve Shkëlzen Gjata dhe Mariglen Mellaraj për veprën penale “Prodhimi dhe shitja e lëndëve narkotike”, “Përshtatja e lokalit për përdorim droge” dhe “Nxitja për përdorimin e drogës” parashikuar nga Nenet 283/2, 285/a dhe 286 të Kodit Penal, dhe ndaj shtetases Pranvera Isufaj për veprat penale “Prodhimi, mbajtja, blerja apo shitja pa leje e armëve të ftohta” dhe “Kundërshtimi i punonjësit të policisë së rendit publik” parashikuar nga Nenet 279 dhe 236/2 të Kodit Penal.
