Në Gjykatën themelore të Kumanovës ka vazhduar procesi gjyqësor ndaj Boban Iliq, i akuzuar për mbytjen e katërvjeçarit, Almir Aliu. Dëshminë e tij e ka dhënë njëri nga mjekët, neuropsikiatër në Klinikën për neuropsikiatri.
Sipas tij, i akuzuari nuk ka patur motiv psikopatologjik, nuk ka qenë në situatë të frikës psikologjike, nuk ka qenë në gjendje të përkohshme të çrregullt shpirtërore, por, sipas tij, ka qenë i frikësuar, pasi që ka menduar se i është rrezikuar integriteti fizik.
Avokati mbrojtës është pajtuar me këtë konstatim të mjekut, ndërkaq avokati i familjes Aliu, Asmir Alispahiq ka deklaruar se do të kërkojnë analizë plotësuese pasi që, sipas tij, nuk janë shqyrtuar të gjitha materialet e dorëzuara. Edhe avokati tjetër, Ibrahim Bajrami tha se ekspertiza nuk është e plotë, duke shtuar që me një ekspertizë plotësuese do të eliminohen të gjitha mangësitë e ekspertizës.
