Gazetari Milaim Zeka është ftuar nga Gjykata Themelore e Mitrovicës, që me datën 25 nëntor të paraqitet në seancë dëgjimore përkitazi me bastisjet që janë zhvilluar dje në pronën e tij dhe vendin e punës.
Lajmin e ka konfirmuar vetë gazetari, duke thënë se, EULEX e ka ftuar atë në seancë dëgjimore.
“Po me kanë ftuar që unë të paraqitëm në gjykatën në veri të Mitrovicës me datën 25 nëntor, në lidhje me rastin “Grupi i Drenicës”, ka thënë Zeka.
Ai ka thënë se, dje prokuroria e EULEX-it i ka konfiskuar shumë materiale, në mesin e tyre edhe telefonin celular, që është shkelje e të drejtave të njeriut.
Zeka është i dyshuar për shkelje të fshehtësisë në procedurë, pengim i tentativës së prokurorit gjatë procedurës penale dhe frikësim gjatë procedurës penale në rastin “Grupi i Drenicës”.