Gjatë një takimi të zhvilluar me strukturat e AAK-së në Istog, Klinë dhe Pejë, kryetari i kësaj partie, Ramush Haradinaj, ka diskutuar me anëtarë të AAK-së për proceset që po kalon Kosova, si dhe për përgjegjësinë e Qeverisë për krizën politike dhe institucionale në vend, njofton përmes një kumtese partia.
Siç njofton AAK, në këto takime është parë një gatishmëri e madhe për protestën e 17 shkurtit.
“Kjo me qëllim të rritjes së frontit kundërshtues ndaj degradimin e qeverisjes dhe të jetesës në vend”, thuhet në komunikatë.
Po ashtu, Haradinaj ka thënë se është gabim të keqkuptohet propozimi i tij për zgjedhje të parakohshme, si dëshirë për pushtet.
Ky propozim, ka sqaruar ai, është ofertë politike për të dalë vendi nga kriza, e jo qëllim në vetvete për zgjedhjet.
Lideri i AAK-së ka thënë se është degjeneruar qeverisja, është shkelur kushtetuta, është rritur korrupsioni.
Sipas tij, partitë në pushtet kanë kapur të gjitha strukturat dhe bordet, prandaj përgjigja më e mirë ndaj të gjithë shkelësve, do të ishte që populli me votën e vet të përfshihej në zgjidhjen e kësaj krize.