Një vdekje e dyshimtë ka ndodhur dje në QKUK. Njq qytetarë i Kosovës është lajmëruar në polici se bashkëshortja e tij e cila po qëndronte në këtë institucion ka ndërruar jetë në rrethana të dyshimta.
Policia thotë se është duke e hetuar këtë rast, derisa viktima është dërguar për obduksion.
Nga ana tjetër, nga QKUK-ja e cila ka njoftuar për këtë vdekje dhe një tjetër të një foshnje dymuajshe, thotë se kanë ndodhur pas operacionit. QKUK thotë se puna në sallat e operacionit është duke u zhvilluar normalisht.
Në përgjigjen për “Bota sot”, zëdhënësi i QKUK-së, Shpend Fazliu thotë se nga e enjta janë pezulluar përkohësisht rastet e operacioneve të planifikuara, ndërsa ato urgjente janë operuar në klinikën emergjente.
“Qendra Klinike Universitare e Kosovës (QKUK) njofton opinionin publik se është duke u zhvilluar normalisht puna në sallat e operacionit në Klinikën e Gjinekologjisë me Obstetrike, në Klinikën e Ortopedisë, Klinikën e ORL-së dhe Klinikën e Oftalmologjisë. Ndërkohë, nga dita e enjte, përkohësisht janë pezulluat rastet e operacioneve të planifikuara (jo urgjente) në bllokun e klinikave kirurgjike. Rastet urgjente nga blloku kirurgjik janë operuar në sallat e Klinikës Emergjente, të cilat poashtu janë në funksion”, thuhet në përgjigjen e tij.
Ai tregon më tutje për dy vdekjet e ndodhura ditën e enjte, pas intervenimit mjekësor.
“Nga dita e enjte, klinikat kirurgjike në QKUK, kanë raportuar për dy raste të vdekjeve ndodhura pas operacionit. Menjëherë janë ndërmarrë të gjitha masat e nevojshme për të hulumtuar “dyshimet” e ngritura për ndonjë parregullsi të mundshme si i parasheh edhe legjislacioni në fuqi”, thekson Fazliu.
QKUK, kërkon nga mediet dhe opinioni publik të jenë të kujdesshëm duke lënë hapësirë për hulumtim nga organet kompetente./BS