Në Kumanovë tashmë gjendja është qetësuar, mirëpo banorët e kësaj komune me t’u kthyer në shtëpitë e tyre kanë hasur në rrënoja e gërmadha, por jo vetëm.
Publicisti Kim Mehmeti, në një bisedë telefonike me Top Channel, thotë se familjarët kthehen e shohin gjak në shtëpitë e tyre, por nuk dinë të thonë se kush është vrarë aty, pasi sipas tij, këtë përgjigje nuk e jep as policia.
“Ne kemi të dhëna për një të zhdukur, që për 48 orë familjarët nuk e dinë ku ndodhet. Bëhet fjalë për Besnik Hajdinin. Familjarët kanë pyetur edhe në polici, por ajo u ka thënë se nuk ka informata. Por kjo nuk është hera e parë kur policia thotë njëherë se nuk e di se ku ndodhet personi dhe pastaj del që e ka ditur tërë kohën dhe e ka mbajtur si dëshmitar të mbrojtur. Familjarët thonë se është policia që e ka arrestuar atë dhe e ka ndarë nga fëmijët”, thotë Mehmeti.
Ai ka treguar se sot mediat kanë arritur deri tek arrestuarit, që policia i quan terroristë, mes të cilëve është edhe Sami Ukshini, por gjithmonë jozyrtarisht dhe sipas proces-verbaleve policore që kanë gjetur mediat.
“Flitet edhe për Gent Stefajn, shtetas shqiptar, e dhjetëra të tjerë. Por mbetet diçka alogjike. Kur njerëzit shkojnë në atë lagje, shohin që është bërë luftë. Por shtrohet pyetja se si kanë hyrë këta persona, që duket se u është dashur të kenë edhe një maune me armatime? Si kanë hyrë pa i parë askush? Askush nuk di ta thotë nga erdhën ata luftëtarë. Ndërsa një banor i asaj lagjeje thotë se më shumë është shtënë në ajër”, ka thënë Mehmeti në këtë intervistë.
Publicisti Mehmeti thotë se për ta bërë këtë luftë që ndodhi 3 ditë më parë në Kumanovë, duhet të përgatitesh me muaj, ndërsa thekson se ata luftëtarë duhet të kenë hyrë me maunë e armatime të rënd duke shtuar se “mos ta shohësh këtë është e pamundur”.
“Ndaj kjo luftë kishte si qëllim të shpëtonte regjimin e VMRO-DPMNE-së dhe BDI-së, për të mbuluar përgjimet që publikoi opozita. Kjo u bë me mbështetjen e një qeverie ku bën pjesë edhe një parti shqiptare si BDI-ja. Ato shtëpi u dogjën dhe njerëzit kanë humbur jetën”, ka theksuar ai.
Mehmeti beson se ngjarjet e fundit në Kumanovë nuk do të nxisin ekstremizmin mes shqiptarëve, duke theksuar se e gjithë kjo luftë kishte për qëllim të shkatërrojë një frymë qytetare që filloi të ngjallej në Maqedoni.
“Për në maj ishin paralajmëruar protesta të përbashkëta shqiptaro-maqedonase kundër këtij regjimi që po na ngulfat të gjithëve dhe mendoj se kjo që ndodhi në Kumanovë kishte si qëllim të ndalonte këtë frymë”, ka përfunduar ai.