Kryetari i komunës, Agim Bahtiri dhe drejtori i IADK-së, Zenel Bunjaku, kanë nënshkruar aneksin e parë të Marrëveshjes për Bashkëpunim, për bashkëfinancim të projekteve për vitin 2017. Të pranishëm në takim ishin edhe nënkryetari i komunës, Faruk Mujka dhe drejtori i Drejtorisë për Bujqësi, Nasuf Aliu.
Kryetari Bahtiri me këtë rast ka falënderuar IADK-në dhe veçanërisht drejtorin Bunjaku për bashkëpunim të ndërsjellë dhe të frytshëm, falë të të cilit në bujqësinë e komunës janë realizuar një varg projektesh të rëndësishme, që kanë ndikuar në shtimin e interesimit të fermerëve për tu marrë me bujqësi.
Ndërkaq, drejtori ekzekutiv i IADK-së, Zenel Bunjaku, vlerësoi të suksesshëm bashkëpunimin me komunën e Mitrovicës dhe premtoi se IADK- do ët vazhdoj të mbështesë projektet nga fusha të ndryshme të fermerëve mitrovicas.
“Projektet që do të realizohen në bazë të kësaj marrëveshje janë vetëm fillestare për këtë vit. Do të ketë mbështetje të IADK-së për komunën e Mitrovicës edhe për realizimin e më shumë projekteve gjatë akti viti”, tha ai.
Me nënshkrimin e këtij aneksi të marrëveshjes, do të përfitojnë 10 fermerë për kultivimin e mjedrës në sipërfaqe prej 2.000 metra katrorë, një fermerë do të përfitoj pajisjet për pompimin e ujit me energji solare, projekte këto që në tërësi kapin shumën prej 23.000 euro, nga të cilat IADK- do t’i siguroj 65 për qind, komuna 20 për qind dhe fermerët 15 për qind.
Ndërkaq, për shpenzimet operacionale, po sipas përqindjes së lartpërmendur, do të sigurohen edhe 5.200 euro. Këtu bënë pjesë selektimi, këshillat, trajnimet, monitorimi etj.
