Trëndafili i egër ose Rosa Canina ka vendlindjen në Europë dhe Shqipëria është një nga vendet e bekuara me këtë super bimë. Kjo shkurre e egër është me degë gjëmbore dhe arrin nga 2 në 4 metra lartësi. Ka një rrënjë të gjatë dhe fibroze. Degët e saj çelin lule të bardha ose ngjyrë rozë me nga pesë deri në shtatë petale nga fillimi i pranverës deri në mes të verës.
Trëndafili i egër është një bimë, që rritet në shkurre dhe vlerat e tij në kurimin e sëmundjeve janë të pallogaritshme. Në mjekësinë popullore pjesët që ndihmojnë në lehtësimin e sëmundjeve janë frutet, që përftohen pas tharjes së luleve. Frutet e trëndafilit të egër ndihmojnë mjaft në kurimin e disa prej sëmundjeve më të përhapura.
Ato janë të pasura me vitamina, acide yndyrore, antioksidantë, madje përbëjnë një metodë domethënëse për përfitimin e vitaminës C. Kokrrat e trëndafilit të egër mund të përdoren për çaj, mund të bëhen reçel ose marmaladë dhe mund të përfshihen në shumë ushqime të tjera. Varianti i tyre i thatë që përdoret në çaj është kryesisht më popullori.
Janë plot me antioksidantë, këto kokrra që kanë përmasat e qershive janë thesari i vërtetë që trëndafilat e fundit të verës u dhurojnë njerëzve. Ato përmbajnë karotenoidë dhe substance të tjera bioaktive. Trëndafili i egër njihet për vetitë e tij autostimulante dhe antialergjike. Për këtë arsye, ai është shumë efektiv kundër rrufës dhe virozave të dimrit. Ai forcon sistemin imunitar.
Trëndafili i egër mund të përdoret edhe për të luftuar dhimbjet e kyçeve që vijnë nga reumatizma apo artriti. Çaji nga trëndafili i egër, ndikon mirë kundër lodhjes, plogështisë dhe anemisë. Këshillohet që trëndafili i egër të mos përdoret gjatë shtatzënisë dhe as në fazën e ushqyerjes me gji të fëmijës. Kjo pasi mund të shkaktojë reagime alergjike tek bebet e vogla.