Së fundi, BE ka kërkuar që të mos respektohet vendimi i Gjykatës Kushtetuese për formimin e Asociacionit të komunave me shumicë serbe. Ndërsa, ka kërkuar që të respektohet verdikti kushtetuese për Manastirin e Deçanit.
Kjo gjë po vlerësohet si standard i dyfishtë për Kosovën.
Analisti politik, Leon Duhanaj komentoi këtë qëndrim të Bashkimit Evropian karshi vendimeve të Gjykatës Kushtetuese.
Fillimisht, ai u shpreh se Kushtetuta e Kosovës është shumë e veçantë sa vështirë që mund të gjendet si ajo, pasi aty vendi ynë paraqitet si shtet me karakter multietnik, edhe pse mbi 90% shqiptarë.
“Kosova shtet që në fillim ka qenë kompromis i madh për shqiptarët, sepse lufta për liri e çlirim ishte bërë për një qëllim me të lartë, për bashkim kombëtar. Pas çlirimit, edhe në bisedimet e Vjenës për statusin final, u bë kompromis nga pala kosovare, duke e pranuar një shtet me karakter multietnik, edhe pse mbi 90% shqiptarë.
Kushtetuta e Kosovës është në atë mënyrë që edhe një e tillë nuk mund të gjendet. Pra ka aq shumë të drejta të rezervuara për minoritetet, e sidomos për atë serb, sa që kanë ingirenca edhe të bllokojnë procese me rëndësi për vendit”, deklaroi analisti.
Sipas Duhanajt, Kosova humb nëse Kushtetuta e saj hap ‘dyert’ për të drejta shtesë për minoritetet e të cilat mund të jenë qëllimkëqija.
“Kosova nuk dobësohet, as nuk humb nëse minoritetet gëzojnë të drejta. Por Kosova humb nëse Kushtetuta e saj edhe ashtu e ndjeshme, e humbë kuptimin e saj duke hapur dyert për kuazi të drejta shtesë e të cilat janë veç se qëllimkëqija.
Bashkimi Evropian, duhet ta ketë parasysh faktin se për shqiptarët kjo kushtetutë, është kulmi i tolerancës dhe se ne nuk jemi të gatshëm ta dorëzojmë shtetin në tavolinë”, vlerësoi ai.
Në fund, analisti kërkoi të gjendet një kompromis sa i përket Manastirit të Deçanit dhe të menaxhohet në mënyrën më të mirë të mundshme.
“Për sa i përket manastirit të Deçanit, konsideroj që duket të gjendet një kompromis. Prona duhet të shfrytëzohet dhe menaxhohet në atë mënyrë që të mund të jetë e qasshme për turizëm apo ide tjera. Për lidhje rrugore me Malin e Zi e të mos mund të bllokohet në mënyrë arbitrare nga askush.
Nëse gjendet një kompromis i tillë, ku komuna apo qeveria e mbanë kontrollin mbi të, atëherë mund të realizohet, por jo, në asnjë mënyrë nëse ajo synon të keqpërdoret si enklavë”, përfundoi Leon Duhanaj për “Bota sot”.
