Organizata jo qeveritare nga Rusia që thuhet se veprimi i tyre nuk është vetëm humanitar, kanë filluar një aksion në disa fshatra të Kosovës konkretisht në disa fshatra nga Komuna e Vushtrrisë.
Rusia ka filluar aksionin e ndihmave për fëmijët serbë të fshatrave serbe të Kosovës në jug nëpërmes Kishës së Graçanicës.
Përfaqësuesit serbë të fshatrave ndihmën ua atribuojnë “lidhjeve të thella”, që serbët e Kosovës kanë tradicionalisht me Rusinë, ndërsa shqiptarët vlerësojnë se Rusia në këtë mënyrë po futet gjithnjë e më thellë në brendi të Kosovës me qëllime të caktuara.
Disa organizata humanitare të Rusisë, të cilat veprojnë në veri të Kosovës e për të cilat vlerësohet se nuk merren vetëm me ndihma humanitare, kanë shtrirë aktivitetin e vet edhe në jug të vendit.
Bajram Gecaj anëtar i Lidhjes Demokratike të Kosovës (LDK) ka thënë se prezenca ruse në Kosovë, por edhe në rajon në përgjithësi, mund të jetë gjithherë e rrezikshme, posaçërisht kur merret parasysh tentimet e mëhershme për destablizimin e rajonit, siç ishte rasti me Malin e Zi.
“Institucionet e Republikës së Kosovës duhet të jenë tej mase vigjilent në lidhje me cilëndo prezencë të tillë në territorin e Kosovës, e në mënyrë që të mos keqpërdoret misioni humanitar për çështje të natyrave krejtësisht tjera të cilat mund të na sillnin probleme dhe destabilizim” ka thenë Gecaj për “Bota sot”.
