Në mbrëmjen e së martës është bërë e ditur që Ministri i Financave, Bedri Hamza ka marrë vendim që të mos zbatojë vendimin e kryeministrit Ramush Haradinaj për rritjen e pagave.
Drejtori për Ballkanin Perëndimor i Fondacionit 'Rockefeller Brothers', Haki Abazi ka thënë për “Bota sot” që nga fillimi partneret në koalicion kanë qenë me pozita të ndryshme në shumicën e çështjeve përfshirë këtu edhe pozicionimet për aspektet buxhetore.
“Përplasja për rritjen e pagave është e natyrshme sidomos duke pas parasysh që PDK ka bërë rritjen e pagave në të kaluarën për kategori të ndryshme dhe tani nuk lejon që një gjë e tillë të bëhet për të treguar kontroll dhe "muskuj" jo pse ka ndonjë disiplinë për shpenzimet”, ka deklaruar Abazi.
Për më tepër, Abazi ka shtuar se PDK nuk i shkon përshtat prishja e koalicionit pasi mund të mbeten pa pushtet dhe se krijimi i krizave ka për qëllim të tërheqë vëmendjen nga problemet parësore.
“Në këtë kohë dhe përballja me sfidat nuk i shkon për shtati PDK për të prishur koalicionin meqë do të mbetet plotësisht pa pushtet dhe është e natyrshme që të mbrojë vetën por duke dashur të tregoje se ka pushtet. E gjithë kjo është një loje dhe aspak seriozitet. Krijimi i krizave dytësore gjithashtu ka për qëllim të tërheqë vëmendjen nga problemet parësore me të cilat po ballafaqohet vendi”, ka përfunduar Abazi për “Bota sot”.