Pas ratifikimit të projektligjit te kufirit mes Kosovës dhe Malit të Zi në Kuvend, të gjithë qytetarët e vendit shpresojnë në heqjen e vizave nga ana e BE-së.
Por, njohësi i çështjeve ndërkombëtare thotë se ratifikimi i Demarkacionit nuk nënkupton liberalizim.
Faik Krasniqi, në një prononcim për “Bota sot” thotë se pas ratifikimit të kësaj marrëveshje edhe me tej Kosova nuk e fiton liberalizimin e vizave.
Pasi që, sipas Krasniqit, kushti kryesor mbetet lufta e korrupsionit dhe krimit te organizuar. Ai thotë se mbrapa grilave do të shkojnë koka të mëdha të politikës.
“Ratifikimi i Demarkacionit nuk nënkupton që Kosova fiton liberalizimin e vizave, sepse kushti kryesor mbetet lufta e korrupsionit dhe krimit te organizuar. Por ky kusht nuk do të thotë që do të përmbushet ashtu siç kërkon BE-ja, sepse luftimi konkret i korrupsionit dhe krimit të organizuar nënkupton që mbrapa grilave të shkojnë koka të mëdha të politikës, prandaj BE-ja do shtirret dhe mjaftohet me arrestimin e disa "peshqve" të vegjël, dhe institucionet do shtirren se gjoja e kanë plotësuar këtë kriter”, u shpreh Krasniqi.
Krasniqi thotë se procedurat e BE-së do të marrin së paku 6 muaj kohë. Njohësi i çështjeve ndërkombëtare thekson se nëse rekomandimi i vizave bëhet më së largu në muajin qershor të këtij viti, atëherë në dhjetor qytetarët e Kosovës mund të lëvizin pa viza.
“Sidoqoftë, procedurat e BE-së do të marrin së paku 6 muaj kohë, sepse do të procedohet në tre mekanizma, na Komisionin Evropian, Këshillin Evropian dhe Parlamentin Evropian, dhe 6-8 javë merr kohë procedimi dhe kalimi i saj, që do të thotë se deri në 6 muaj merr kohë. Nëse Rekomandimi i vizave bëhet më së largu në muajin qershor të këtij viti, atëherë në dhjetor të këtij viti qytetarët e Kosovës mund të lëvizin pa viza në zonën shengen”, ka përfunduar Faik Krasniqi për “Bota sot”.
