Inspektorati i Komunës së Prishtinës ka rrënuar këtë të mërkurë një mbindërtim në një prej ndërtesave në lagjen Dardania.
Ky veprim është ndërmarrë pasi që pala nuk i ka ndaluar punimet edhe pas urdhrit nga komuna.
“Javë më parë është evidentuar një mbindërtim pa leje në lagjen Dardania. Inspektorët e Ndërtimit e kanë urdhëruar palën që t’i ndalë menjëherë punimet ndërtimore dhe ta rrënojë vet pjesën e mbindërtimit. Vendimi dhe urdhëresat e Inspekcionit nuk janë përfillur nga ana e palës, dhe i njëjti i ka vazhduar punimet në mbindërtim”, thuhet në kumtesë.
“Si rrjedhojë, Sektori i Ndërtimit në kuadër të Drejtorisë së Inspekcionit ka ekzekutuar sot vendimin për rrënim duke e larguar konstruksionin nga pjesa e sipërme e ndërtesës. Kështu hapësira është kthyer në gjendjen e mëparshme”.
