Kuvendi Komunal i Prishtinës, me 28 vota pro dhe asnjë abstenim ka miratuar sot propozimin për falje të tatimit në pronë në vlerë 75 euro.
Në seancën e kuvendit komunal, në të cilën nuk morën pjesë asamblistët e LDK-së dhe as kryetari Përparim Rama, partitë politike u dakorduan që shuma e falur për tatimin në pronë të jetë 75 euro, e jo 100 sa ka qenë mundësia e paraparë.
Kryesuesja e Kuvendit Komunal, Nora Kelmendi, tha se tatimpaguesit që kanë paguar faturën e tatimit në pronë për këtë vit, shuma e falur do t’i llogaritet si paradhënie për vitin 2024.
Kelmendi: Miratohet vendimi për faljen e tatimit në pronë në vlerë 75 euro
“Miratohet vendimi për faljen e tatimit në pronën e paluajtshme për vitin tatimor 2023. Falja e tatimit për pronën e paluajtshme vlen për të gjithë tatimpaguesit e kryeqytetit për vitin tatimor 2023. Shuma për faljen e tatimit në pronë do të jetë jo më shumë sesa 75 euro. Në rast se tatimpaguesit kanë paguar faturën e tatimit për pronën e paluajtshme për vitin 2023 shuma e falur llogaritet si paradhënie për vitin 2024”, tha ajo.
Ky vendim pritet të hyjë në fuqi shtatë ditë pas publikimit në ueb faqen e komunës.
Kryetari i Prishtinës, Përparim Rama, pati publikuar propozimin e tij për falje të tatimit në pronë për vitin 2023, ku parashihej që të falet çdo ndryshim i vlerës së tatimit në pronë nga viti 2022 në vitin 2023, prej 0 deri në 100 euro.
Gjykata Kushtetuese javë më parë vendosi që vendimi i Qeverisë së Kosovës për faljen e tatimit në pronë, përmes ndryshimeve në Ligjin për tatim në pronë, nuk cenon përgjegjësitë komunale.
Rritja e faturave të tatimit në pronë ka ndodhur pas vlerësimit të përgjithshëm të tokave dhe objekteve rezidenciale, që ka bërë Ministria e Financave, Punës dhe Transfereve në fund të vitit të kaluar.
