Komuna e Malishevës, në kuadër të programit DEMOS, për vlerësim të performancës komunale, është përfituese e projektit për ndërtimin e rrethojës dhe rezervuarit të ujit për pije në fshatin Senik.
Komuna përmes një kumtese për media ka bërë të ditur se ky projekt është bashkëfinancim mes komunës , Helvetas Swiss Intercooperation dhe MAPL-së.
“Bazuar në marrëveshjen e nënshkruar, projekti nga granti i performancës, do të kushtoj 114 089 euro, dhe është bashkëfinancim me komunën. Pjesa e financuar nga granti i performancës (DEMOS) është 77 964 euro, ndërsa pjesa e Komunës së Malishevës, është 36 125 euro”, bëhet e ditur ndër tjerash.
Përmes këtij projekti, synohet të realizohet një pjesë e rëndësishme e ndërtimit të sistemit të ujësjellësit nga fshati Senik, e ku do të furnizohen me ujë edhe dymbëdhjetë fshatra tjerë të Komunës së Malishevës.