Ngjarja e radhës për fundvit është shiu i meteorëve Leonid. Leonidët kanë qenë aktivë që nga fillimi i nëntorit, por pritet të arrijnë kulmin këtë fundjavë në orën 12:33 të mëngjesit të shtunën, sipas EarthSky. Vëzhguesit e qiellit mund të shohin 10 deri në 15 meteorë në orë në një shfaqje spektakolare.
Ata që dëshirojnë të shohin këtë shi meteorësh janë me fat pasi Hëna do të jetë në fazën e saj të gjysmëhënës në rritje, tha Sharon Morsink, një profesoreshë e fizikës pranë Universitetit të Albertës në Edmonton, Alberta. Hëna do të jetë 23% e plotë natën e pikut të shiut, sipas Shoqatës Amerikane të Meteorëve.
Ndërsa kulmi i këtij shiu do të arrijë të shtunën, të njëjtat ritme të meteorëve mund të shihen disa ditë para dhe pas.
“Koha më e mirë për të parë shiun do të jetë pas mesnatës në çdo zonë kohore kur yjësia e “Luanit” do të jetë më e larta në qiell”, tha Morsink, e cila gjithashtu menaxhon observatorin astronomik të universitetit.
““Luani” është rrezatuesi i shiut meteorik, i cili është pika nga ku duket se e ka origjinën fenomeni”, shpjegoi ajo.
Sipas NASA-s, Leonidët janë të famshëm për gjenerimin e ‘stuhive të meteorëve’, term që përdoret kur një shi arrin shpejtësinë prej të paktën 1000 meteorësh në orë.
