Skandali i radhës në shëndetësinë e Maqedonisë ka ndodhur në Klinikën e Oftalmologjisë në Spitalin e Shkupit, ku 15 pacientë të operuar së fundmi po përballen me infektime serioze të syve.
"Një skandal i madh për të cilin ne kemi informacione ka ndodhur në klinikën e syve në Qendrën Klinike në Shkup. Sipas informacioneve tona, 15 pacientë të operuar tani përballen me një infeksion serioz në sy", tha sot në një konferencë shtypi Goce Çakarovski, kryetari i Komisionit për Shëndetësi të LSDM-së.
Ai kërkoi përgjigje nga autoritetet shëndetsore nëse kjo është e vërtetë dhe se a janë sallat e Klinikës për sëmundje të syve të mbyllura për operacione dhe prej kur.
"Informacionet që i kemi flasin për një skandal të rëndë me përdorimin e një preparati të ndotur për sy, me të cilin janë trajtuar pacientët e operuar", tha Çakarovski dhe pyeti nëse është preparati "Avastin", i përdorur gjatë operacionit, shkaktar i infeksionit të rëndë.
"Kërkojmë nga ministri Nikolla Todorov të japë përgjigje për pyetjet e shumta, si më përgjegjësi për gjendjen katastrofale në shëndetësi që reflektohet dëmshëm mbi shëndetin e qytetarëve", tha Çakarovski.