Kryeministri Sali Berisha ka hedhur akuza sot ndaj kreut të Partisë Socialiste, Edi Rama për blerje votash. Në fjalimin e mbajtur gjatë mitingut elektoral në Kukës, Berisha tha se një prej njerëzve të Ramës, me një çantë me para kërkon të blejë vota. Berisha tha se kandidatët e PD-së në Kukës janë njerëzit që do të jenë gjithmonë në shërbim të banorëve, ndryshe nga modeli që ka sjellë Edi Rama.
“Modeli i tij është Çolja, një njeri pa dinjitet, pa personalitet, një njeri që mbush një çantë me para dhe i thotë Edvin Kristaq Ramës do të shkoj të blej votat e malokëve. Përçmojeni të dërguarin e tij, se nuk na shet e nuk na blen kush, se nuk jemi shitur e blerë, jemi sot të lirë, se nuk jemi shitur e blerë, ecim sot drejt fitores”, tha kreu i mzhorancës.
Gjatë fjalës së tij në Kukës, Berisha ka bërë dhe krahasimin mes tij dhe kreut të PS-së, Edi Rama, duke kërkuar që qytetarët të mendohen para se të vendosin për të votuar në 23 qershor.
“Le të bashkohemi për modelin e vlerave që besojmë, vlerave të barazisë para ligjit. Ju dhe Sali Berisha jetoni në një apartament. Pas 20 vitesh në politikë, unë në një apartament 120 metër katrorë. Shoku i autobusit ecën nëpër Shqipëri me një vilë 57 metra të gjatë dhe një pallat pesëkatësh, për të cilët nuk ka deklaruar origjinën e parave, qoftë edhe një qindarkë, sepse atë ia ndërton Koçoja, Fideli, me paratë e bashkisë që ai ka ndarë me ta. Modeli ynë janë këta deputetë, që nga mëngjesi deri në darkë do të punojnë për ju”, tha kryeministri Sali Berisha.
