Pasditen e një dite më parë kanë filluar reshjet e dëborës në zonat malore, ndërsa temperaturat janë ulur ndjeshëm.
Bëhet e ditur se me intensitet të ulët dëbora ka filluar në qarkun Kukës dhe Shkodër mbrëmjen e kaluar, por temperaturat nën zero kanë sjellë edhe ngrica në rrugë.
Si pasojë, Emergjencat Civile kanë publikuar një sërë masash, ndërsa udhëzojnë drejtuesit e mjeteve të përdorin zinxhirët në disa akse rrugore.
Fushë-Arrëz – Iballë
Fushë Arrëz – Qafë Mali – Qafë Shllak
Qafë Mali – Fierzë
Bajram Curri – Valbonë
Kukës – Qafë Shllak
Tunel i Kalimashit – Morinë.
Aktualisht janë vështirësisht të kalueshme këto segmente rrugore nga dëbora, dhe po punohet për hapjen e tyre:
Qafë Mali – Dardhë, në zonën e Pukës
Qafë Thore – Theth, në zonën e Malësisë së Madhe
Tamarë – Vermosh
Bushtricë, Kukës – Kala e Dodës, Dibër.
Mësohet se trashësia e dëborës në këto akse shkon nga 20 cm deri në 50 cm. Prezencë dëbore ka edhe në “Rrugën e Kombit” ku mësohet se po punojnë borëpastrueset.
Komisionet e Emergjencave Civile në Qarqe dhe Drejtoria e Përgjithshme e Emergjencave Civile në MPB po ndjekin situatën duke e shoqëruar me masa përkatëse në terren.
