Kreu i Komisionit të Posaçëm Hetimor të aferës së CEZ, Taulant Balla ka kërkuar që sekseri i dyshuar i marrëveshjes së privatizimit të OSSH, të sillet forcërisht të dëshmojë në komision.
Deklaratat Balla i bëri nga mbledhja e sotme ku Nue Kalaj, personi i akuzuar se ka luajtur rolin e sekserit, nuk është paraqitur për të dëshmuar në Komisionin Hetimor. Kjo ka sjellë për pasojë edhe kërkesën e bërë nga Balla drejtuar policisë që ta sjellë forcërisht.
Sipas Ballës, i akuzuari ka kryer transaksione dhe tërheqje të dyshimta si shpërblim për këtë privatizim. Këto transaksione, referuar asaj që tha Balla, mësohet se kapin një vlerë që shkon deri në 7 milionë euro.
Kjo aferë për deputetin socialist erdhi si pasojë e miqësisë së ngushtë që kanë Shkëlzen Berisha dhe shtetasi Nuel (Nue) Kalaj.
"Komisioni Hetimor për privatizimin e OSSH tek CEZ sot ka administruar prova shumë të rëndësishme lidhur person Nuel (Nue) Kalaj i cili sipas dëshmive të deritanishme ka qenë "sekseri" i martesës së qeverisë shqiptare të Sali Berishës me kompaninë CEZ. Komisioni ka administruar llogari bankare të Nue Kalajt i cili ka marrë nga CEZ transferta bankare mbi 7 milionë euro. Dhe këto shuma më pas i ka tërhequr cash me 16 qershor 2009, vetëm pak ditë para zgjedhjeve të vitit 2009. Komisioni po heton pse CEZ i ka bërë këto transferta tek ky individ dhe ku i ka çuar paratë cash Nue Kalaj mik i ngushtë i djalit të Sali Berishës, Shkëlzen Berisha", u shpreh Balla.
