Kryeministri i vendit, Edi Rama ka folur për herë të parë pas vendimit të shkarkimit të ministrit të Drejtësisë, Ylli Manjanin nga kabineti qeveritar, ku u ndal në arsyet pse kishte marrë këtë vendim.
I ftuar në “Tonight Ilva Tare”, Rama e ka konsideruar si një opinionbërës që nuk duhet të fliste jashtë kabinetit.
Të hënën shkarkuat Ministrin e një partie aleate. Si është puna e shkarkimit të tij?
Besoj që nuk mund të ekzistojë një qeveri serioze, nëse një ministër nuk respekton skuadrën, rregullat që ka skuadra, mbi të gjitha detyrat. Pasi detyra e ministrit është të mbulojë detyrat që i cakton ligji, dhe jo të bëjë opinionistin. Nuk ka asgjë nëse dikush kërkon të kritikojë qeverinë. Ta bëjë këtë jashtë radhëve të modelit qeveritar.
E ka të ndaluar një ministër të flasë?
Qeveria shqiptare ka një kod etik të miratuar me konsensus, i cili përcakton qartësisht marrëdhëniet e kabinetit me publikun. Një ministër ka detyrën të informojë publikun, por fillimisht t’i shërbejë publikut.
