Deputeti i Partisë Demokratike Astrit Patozi nuk bie dakord me ftesën që ish-kryeministri Sali Berisha bëri në drejtim të LSI-së, për krijimin e një qeverie teknike pa Ramën kryeministër.
Patozi ka shkuar edhe më larg, duke thënë se qeveria është një dhe se të dyja forcat politike në koalicion janë bashkëfajtore për gjendjen e rëndë në vend.
“Kjo protestë po zhvillohet kundër qeverisë dhe për mbajtjen e zgjedhjeve të lira e të ndershme. Ne besojmë se shqiptarët kërkojnë zgjedhje të lira, shumë më tepër nga partitë politike, përfshirë këtu edhe LSI-në. Unë do të isha i fundit që do të përqafoja idenë e një koalicioni me LSI-në”, ka thënë Patozi për “Abc News”.
Një ditë më parë, ish-kryeministri i vendit Sali Berisha iu bëri thirrje të gjitha forcave politike në vend, duke përfshirë edhe Lëvizjen Socialiste për Integrim, që të bashkohen për të rrëzuar Ramën nga pushteti.
