Ministria e Shëndetësisë në një deklaratë për media sot beri te ditur se në orët e para të mëngjesit të ditës së sotme janë paraqitur në Qendrën Spitalore Universitare “Nënë Tereza”, pacientë me shenja të helmimit (intoksikacion) si, skuqje të syve, djegie të syve, irritim të shprehur të lëkurës në zonat e ekspozuara të fytyrës dhe qafës, si dhe në raste të veçanta edhe vështirësi të lehtë në frymëmarrje.
Në shpjegimin e saj, ministria e Shëndetësisë shprehet se “Sipas referimeve të marra nga mjekët në shërbim, të gjithë këta pacientë kanë qënë pjesmarrës në aktivitetin e hapjes së fushatës elektorale të Partisë Demokratike, një natë më parë në Bulevardin “Dëshmorët e Kombit”, në Tiranë. Mes pacientëve, rreth orës 05:00 të mëngjesit është paraqitur edhe lideri i opozitës, Lulzim Basha, me simptoma të ngjashme”.
Ministria e Shëndetësisë po punon për evidentimin e rasteve edhe në spitalet rajonale dhe qendrat shëndetësore në vend. Ndërkohë, në Qendrën Spitalore Universitare “Nënë Tereza” janë pjesa më e madhe e rasteve. 76 pacientë nga të cilët 9 janë shtruar në shërbimin e okulistikës dhe janë nën vëzhgimin e specialistëve. Ministria e Shëndetësisë, në bashkëpunim me ministrinë e Brendshme dhe Drejtorinë e Policisë po punojnë për zbardhjen e plotë të ngjarjes”.
