Të dielën do ndryshojë e gjithë Shqipëria dhe koha e sundimtarëve do të marrë fund. Kështu deklaroi kreu i Partisë Demokratike Lulzim Basha në takimin përmbyllës elektoral në qytetin e Lezhës.
“Pushteti do rrëzohet me votën tuaj. Të dielën do ndryshojë edhe Shqipëria ashtu si bota. Koha e sundimtarëve do marrë fund. Ju do i hapni rrugë ndryshimeve kushtetuese që do lidhin fatin e politikanëve. Rama premtoi 300 mijë vende pune dhe ka mbajtur 0 premtime”, tha Basha.
Sipas kryetarit të opozitës, kryeministri Edi Rama nuk ka prioritet shqiptarët, por pushtetin dhe timonin.
“Rama nuk pati prioritet tuaja, por kishte prioritet e tij me zyra dhe orendi që i kushtuan shqiptarëve mijëra euro. Rama nuk ka prioritet shqiptarët, por pushtetin dhe timonin. 4 vite kohë dhe 16 milionë euro taksa të rritura. 56% e qytetarëve duan të ikin nga ky vend. Por nëse ikin më shumë se gjysma e qytetarëve të këtij vendi, Shqipëria merr fund. Rama vjen përsëri me të njëjtat premtime”, tha Basha.
