Në vijim të punës për parandalimin dhe goditjen e kultivimit dhe trafikimit të kanabisit, policia e Shkodrës bën me dije se ka goditur një tjetër rast të trafikimit të drogës.
Gjatë operacionit të koduar "Rrethina", policia njofton se ditën e djeshme ka vënë në pranga Margjin Livalli, 46 vjeç, banues në Shkodër.
Arrestimi i tij është bërë pasi gjatë kontrollit në banesën e tij është sekuestruar në cilësinë e provës materiale, 10 thasë ku brenda tyre kishte 87 pako me lëndë të dyshuar narkotike Cannabis Sativa, me peshë totale 115 kilogramë.
Lidhur me këtë ngjarje, blutë e Shkodrës sqarojnë se materialet hetimore ia ka kaluar Prokurorisë së Rrethit Gjyqësor Shkodër për veprime të mëtejshme për veprën penale "Prodhimi dhe shitja e narkotikëve”.