Sherri mes një nga figurave të vjetra në PD, Jemin Gjanës dhe Sekretares për Organizatat Partnere në PD dhe njëkohësisht anëtare e Kryesisë, Valbona Mezini në mbledhjen e Kryesisë u bë lajmi i ditës në media. Kjo, pasi u fol për një sulm fizik nga ana e Gjanës ndaj Mezinit.
Por në emisionin “Studio e Hapur” në News24, kreu i PD-së Lulzim Basha mohon të ketë pasur konfrontim fizik. Ai thotë se gjithçka është fryrë dhe se ka qenë një moment tensioni.
Si për t’u ‘shfajësuar’ Basha kujton se në mbledhjet e kryesisë së PS-së, thuhej se ishin nxjerrë armët.
“Nuk ka pasur konfrontim fizik, është një fryrje e bërë me qëllim apo qëllim mbetet për t’u parë. Pati një moment tensionimi, por s’ka patur në asnjë moment dhunë fizike. Ky ka qenë një moment i tejkaluar, që nuk duhet të ndodhte dhe dominoi ciklin e lajmeve dhe sfumoi lajmin që kryesia e PD doli me një vendim unanim. Kujtojmë se është raportuar edhe për nxjerrje armësh në kryesinë e PS-së. Pyeta disa anëtarë të kryesisë pasi mbaroi mbledhja dhe më thanë që ishte e lodhshme, por se ndiheshin mirë, sepse pati debate, por pati unanimitet”, deklaroi Basha.
Lidhur me cilësinë e debatit, Basha tha se ishte cilësor por se tensioni erdhi për shkak se ishte mbledhja e parë pas humbjes së PD në zgjedhje.
“Mendimi im është ky që pas një situate të vështirë ku ndodhet opozita, PD-ja natyrisht që tensioni reflektohet në një mbledhje të parë të kryesisë, por në tërësi debati ka qenë cilësor”, u shpreh ai.
