Bashkia e Tiranës ka mbajtur premtimin duke i ardhur në ndihmë familjes së Fildes Hafizit, gjyqtares së vrarë nga ish bashkëshorti i saj.
Dy fëmijët e saj dhe gjyshërit e tyre janë transferuar në një shtëpi të re ku bashkia ka siguruar pagesën e qerasë dhe mobilimin.
Jo vetëm kaq. Është ndihumar për të bërë procedurat e kalimit të kujdestarisë, nga i ati tek tezja e fëmijëve dhe fëmijët mund të përfitojnë një pension kujdestarie prej 9 mijë lekë në muaj secili si dhe siguruar transporti falas për në shkollë e fëmijëve.
Përmes një letre drejtuar Kryetarit të Bashkisë së Tiranës, motra e së ndjerës, Amela Hafizi (AsIlanaj), ka falenderuar kryebashkiakun Veliaj dhe stafin e tij për mbështetjen e ofruar dy fëmijëve në një moment kaq të vështirë për familjen.
“Më lejoni që nëpërmjet kësaj letre, në emrin e prindërve të mi, të fëmijëve të së ndjerës dhe timin, t’ju shpreh vlerësimin, mirënjohjen dhe konsideratën time të lartë për mbështetjen e çmuar dhe të vyer që na keni ofruar në një moment kaq të kobshëm për familjen tonë dhe mbi të gjitha për fëmijët e Fildezit.
Duam t’ju falenderojmë juve personalisht z. Veliaj që bëtë të mundur që e ardhmja e fëmijëve të mos ndërpritej nga tragjedia, duke na ardhur në ndihmë në një moment kur menduam se e gjithë bota u përmbys” shkruhet në letër
Letra e plotë e motrës së gjyqtares së ndjerë, Amela Hafizi ( Asllanaj) iu dërgua kryebashkiakut Erion Veliaj Tiranë më 25 Shtator 2017.