Tashmë i vetëm përballë të gjithëve, Saimir Tahiri duket i dorëzuar përballë deklaratave politike të kundërshtarëve të tij dhe pranon se i dyshuari për trafik narkotikësh në Itali, Moisi Habilaj, gjatë përgjimeve ka përmendur edhe emrin e tij, por kjo sipas ish ministrit, tregon vetëm se trafikantët kërkojnë të mburren duke përdorur emra pushtetarësh
Tahiri pranon se me kushërinjtë e tij, ndonëse të largët, ka bërë vetëm 1 gabim, shitjen e makinës së tij, pa u interesuar se kujt po ia shiste, në kohë kur ishte ministër
Me emrin e tij në dosjet e policisë italiane, Saimir Tahiri nuk kërkon mbrojtje nga askush, dhe pse kryeministri Rama u distancua nga kjo ngjarje.
Deputeti tha se ndjen përgjegjësi për shqetësimin që po ishkakton familjes së tij dhe personave të afërm dhe u shpreh i sigurtë që kjo ngjarje do të zbardhet në favor të tij.
Tahiri: Sot është një ditë jo e lehtë për mua në raport me veten, në raport me moralin tim, në raport me familjen, në raport me tim bir dhe në raport me të gjithë. Është një ditë jo e lehtë edhe për njerëzit që më njohin, me kolegët në parlament dhe në politikë me njerëzit që më kanë besuar dhe zgjedhur dhe që ende besojnë tek mua.
Dy kriminelë që janë kushërinjtë e mi të shkallës së 10-të janë arrestuar për trafik droge sic u bë e ditur pa hezituar të përmendnin edhe emrin tim sigurisht kriminelë që përdorin emra politikanësh apo ministrash për tu mburur me njëri-tjetrin në dobi të përfitimeve të paligjshme ka pa fund. Unë nuk jam as i pari dhe as i fundit.
Pa asnjë diskutim sot unë nuk do të doja të isha kurrë në këtë pozitë pa dashjen time, por menjëherë do kërkoj nga Prokuroria vetë personalisht dhe me vullnet të plotë pa përfituar nga asnjë lloj imuniteti parlamentar dhe politik të hetohet dhe të vërifikohet gjithçka me mua dhe jo vetëm, mbi punën time dhe jo vetëm me familjen time dhe jo vetëm.
Gabimi i madh dhe i vetëm, që nuk verifikova kujt ja shita makinën
Tahiri: Unë ndjej përgjegjësi morale për veprimet e kujdo, qoftë edhe të ca kushërinjve të mi të gradës së 10-të të cilëve në fakt kam bërë gabimin e madh dhe të vetëm që gati 4 vite më parë u kam shitur makinën personale. Unë sigurisht nuk duhet të kisha neglizhuar kurrë të verifikoja kujt po ja shisja makinën. E pavarësisht se në vendin tonë rrallë ndodh të bëhen këto verifikime, më të shumtë janë ata që ti fshehin apo ti cojnë pasuritë në emra të tjerë, unë përsëri mbaj përgjegjësi morale të plotë për këtë.
Përtej kësaj as kam pasur dhe as kam raport të çfardollojshëm dhe aq më pak raport të paligjshëm, ndaj nuk kam asnjë përgjegjësi më shumë dhe dënoj cdo veprimtari kriminale, të kujdoqofshin, qofshin edhe këta që janë kushërinjtë e mi të gradës së 10-të, që as kanë hezituar të përdorin emrin tim dhe që shpresoj që drejtësia ti hetojë deri në fund, dhe ti dënojë sic i takon atyre dhe kujdo tjetër në bazë të ligjit.
Nuk dua askush të më mbrojë, nuk fshihem pas pushtetit
Tahiri: Unë nuk kërkoj nga askush as të më besojë dhe aq më pak të më mbrojë publikisht. Më së pari nga kolegët e partisë, në parlament ose jo, në qeveri ose jo dhe nga kryeministri. Siç nuk kërkoj nga askush që më njeh dhe beson dhe sot, që të jetë i fortë mbi të gjitha. Unë nuk kërkoj që të më besojë njeri kot. Për më tepër që politikanë që betohen e përbetohen në këtë vend ka plot dhe ky publik ka parë plot kur janë kapur me filmime me regjistrimi duke vjedhur dhe vrarë. Unë nuk jam ajo lloj dhe ajo rracë e as do jem kurrë lloji i politikanit që fshihet pas pushtetit, pas miqësisë me këdo politikanë apo pronarë mediash apo në koridoret e pushtetit.
Opozita ka shfrytëzuar pallavrat e dy kriminelëve
Tahiri: Sic kuptoj edhe kundërshtarët e mi, në opozitë dhe jo vetëm të cilët për herë ta parë dhe të fundit sot, as do ti akuzoj, as do i kundërshtoj se sot është dita e tyre në fakt të shfrytëzojnë pallavrat e dy kriminelëve që i shesin mend njëri-tjetrit apo të tjerëve se kush ka më shumë njohje, influencë apo mbështetje në një veprimtari kriminale që cdo ditë të punës time e kam luftuar dhe do vazhdoj ta bëj duke kërkuar të vërtetën pavarësisht të çmimit të saj.
