Në vazhdën e ndihmave që po japin për familjet skamnore të komunës së Vtisë, mërgimtarët vitias përmes Shoqatës humanitare “Vitia” me seli në Gjenevë, i kanë ndërtuar shtëpinë e re një familjeje të pastrehë në fshatin Beguncë. Kjo shtëpi është përuruar dhe në të janë vendosur anëtarët e kësaj familjeje pikërisht në vigjile të Festës së Fitër Bajramit.
Xhavit Islami, kryetar i Shoqatës “Vitia” i njohur me vite si një njeri humanist me rastin e përurimit të kësaj shtëpie për këtë familje, ka thënë se është i lumtur ai vetë personalisht, por edhe të gjithë ata të cilët kontribuan në ndërtimin e kësaj shtëpie, sepse po e konkretizojnë një vepër edhe një iniciativë që ishte ndërmarrë para tre muajve për të bërë me shtëpi të re këtë familje.
Ai ka shtuar se me iniciativë të shoqatës "VITIA'' në Gjenevë dhe bashkëpunim me shoqatën "Begunca'' dhe donatorë tjerë, ia kthyen shpresat kësaj familje dhe ky Bajram për këtë familje do të jetë i paaharrur sepse kryefamiljari është shprehur se është shumë i emocionuar dhe nuk është në gjendje të flas nga gëzimi, sepse atij u janë kthyer shpresat për të jetuar dhe për të bërë një jetë të lumtur me familje në shtëpinë e re për çka ka falenderuar të gjithë donatorët që kontribuan që ai të këtë shtëpi të re. Ndryshe mërgata vitiase përmes Shoqatës “Vitia” është shembull për aksione humanitare nga më të ndryshmet.
