Kryetari i Bashkisë së Tiranës, Erion Veliaj, i shoqëruar edhe nga deputeti i PS, Ditmir Bushati, inspektoi mbylljen e punimeve, për Rrugën “Ali Demi”.
Kryebashkiaku Veliaj, theksoi se ky është një nga projektet kryesore që synon përmirësimin e infrastrukturës në njësinë nr.1 pasi sipas tij së shpejti nisin punimet edhe për disa projekte të tjera në këtë zonë.
Veliaj: Shkoza, gjithë zona e “Ali Demit” do të jetë pjesa e Tiranës policentrike, do të thotë të ketë mjaftueshëm infrastrukturë për të funksionuar sikur të ishte një qytet më vete, me shërbimet, shkollat, institucionet e tjera.
Veliaj tha se Bashkia e Tiranës është duke punuar në disa ura mbi lumin e Lanës, në mënyrë që sipas tij jo vetëm qendra e Tiranës të ketë infrastrukturë, por edhe zonat e quajtura periferike.
Veliaj: Shumë shpejt, njësia 1 do të përfshihet në projektin tonë të pastrimit dhe do t’u kërkojmë të gjithë qytetarëve që tani që kemi infrastrukturën e mirë të rrugëve, tani duhet ta çojmë në një nivel më lart pritshmërinë tonë qytetarëve.
Kryetari i Bashkisë bëri të ditur se projekti për ndërtimin e 20 shkollave të reja do t’i vijë në ndihmë edhe njësisë nr. 1, për të siguruar institucionet e duhura arsimore edhe për banorët e kësaj zone.
Rehabilitimi i rrugës “Ali Demi” në një gjatësi prej rreth 2 km, por edhe i rrugëve “Emin Harizi” dhe “Shemsi Haka” që janë përreth fushës “Ali Demi”, iu vjen në ndihmë rreth 55 mijë banorëve që jetojnë në këtë zonë.