Kryetari i c, Ramush Haradinaj, ka bërë homazhe tek varrezat e dëshmorëve në Gjilan, duke përkujtuar heronjtë Rexhep Mala e Nuhi Berisha në 40-vjetorin e rënies.
Haradinaj ka thënë se Rexhep Mala e Nuhi Berisha ishin vazhdimësi e përpjekjeve të shqiptarëve për çlirimin e atdheut.
“Bashkë me kolegë bëmë homazhe tek varrezat e dëshmorëve në Gjilan, në kujtim e nderim të Heronjëve të Kombit, Rexhep Mala e Nuhi Berisha, si dhe vizituam familjet e tyre në 40-vjetorin e rënies heroike”.
“Kodra e Trimave në Prishtinë mban këtë emër në saje të trimërisë, të guximit e të gatishmërisë për sakrificë të Rexhës e Nuhiut. Ata ishin vazhdimësi e përpjekjeve të shqiptarëve për çlirimin e atdheut”, ka thënë Haradinaj.
Haradinaj ka shtuar se këto dy figura ishin paralajmëruesit e UÇK-së.
“Këto dy figura të ndritura, ishin përveç motiv për vazhdimësi dhe organizime të tjera e të shumta, ishin edhe paralajmëruesit e Ushtrisë Çlirimtare të Kosovës e cila e solli lirinë. Emrat e tyre si dhe jeta e vepra e tyre, është pasuri për historinë tonë të lavdishme!”, është shprehur Haradinaj.
Ai e ka vizituar edhe kazermën e Ushtrisë së Kosovës në Gjilan.
“Gjithashtu vizituam kazermën e Ushtrisë së Kosovës në Gjilan, ku u njoftuam me punën dhe të arriturat e ushtrisë sonë”. “Të impresionuar, me energjinë e vitalitetin që posedon ushtria jonë! Të motivuar nga trimëria dhe guximi i heronjve si; Nuhiu e Rexhepi dhe e kaluara e lavdishme e Ushtrisë Çlirimtare të Kosovës”, ka thënë Haradinaj.
