Policia e Kosovës (PK) njofton se në operacionin antidrogë “Shtigjet” janë sekuestruar droga sintetike, armë, para, telefona dhe dëshmi të tjera, ndërsa janë arrestuar tre persona.
“Përveç operacionit policor të realizuar një javë më parë (7 prill 2024) në Merdar ku u kapën 20 paketime me mbi 10 kg. me substancë të dyshuar narkotike si heroinë që kapte vlerën rreth 250 mijë euro, mbrëmë me datë 13.04.2024, në orët e vona dhe gjatë natës Njësitet e antidrogës ka planifikuar dhe realizuar një tjetër operacion taktik antidrogë në Prishtinë ku janë arrestuar tre (3) persona të dyshuar, janë gjetur dhe sekuestruar drogë, armë, para, telefona dhe dëshmi tjera relevante për organet e drejtësisë”, thuhet në njoftim.
Policia njofton se hetuesit policorë të Drejtorisë për Hetimin e Trafikimit me Narkotik në Prishtinë, gjatë punës hetimore-operative në terren kanë pranuar informata të besueshme se në rrugën “Fehmi Agani” në Prishtinë persona të dyshuar janë duke u marrë me shitblerje të substancave narkotike të llojeve të ndryshme dhe shitjen po e bëjnë kryesisht në nivelin e shpërndarjes lokale-shtigjeve të ndryshme, raporton “Betimi për Drejtësi”.
“Me datën 13.04.2024 rreth orës 21:30, në funksion të identifikimit dhe arrestimit të personave të dyshuar dhe gjetjes së dëshmive antidroga e Policisë së Kosovës ka planifikuar dhe realizuar një plan të shpejt taktik ku fillimisht në Rr.”Fehmi Agani” në Prishtinë në një parking është ndaluar i dyshuari i parë me iniciale (T.T; data e lindjes: 02.09.1991), i cili është prezantuar me dokument identifikimi të falsifikuar me emër tjetër me iniciale (L.G; data e lindjes:01.06.1992) dokument i lëshuar nga një shtet tjetër dhe gjatë kontrollit të tij i janë gjetur 650 euro para të gatshme në valuta të ndryshme dhe dy telefona celular”, thuhet më tej.
Në vazhdën e realizimit të operacionit policor në të njëjtin parking, thuhet se është identifikuar dhe ndaluar i dyshuari i dytë N.G (24-vjeç), me veturën e tipit Golf 8 me targa nga të huaja dhe të njëjtit gjatë kontrollit i janë gjetur 75 euro para te gatshme, një telefon celular dhe çelësat e një banese.
“Njëkohësisht nga ekipet e antidrogës në teren është arrestuar edhe i dyshuari i tretë, me iniciale D.G; data e lindjes: 19.07.2000, i cili ndodhej afër një automjeti me ngjyrë të bardhë me targa të lëshuar nga po i njëjti shtet i huaj sikurse automjeti i të dyshuarit të dytë dhe gjate kontrollit të automjetit në derën e saj nga ana e shoferit janë gjetur dy qese të mbushura me kërpudha të dyshuara narkotike me peshë 3.9 gram”, thuhet në njoftimin e Policisë.
Bëhet e ditur se lidhur me operacionin është njoftuar prokurori kujdestar nga Departamenti i Krimeve të Rënda në Prishtinë dhe në konsultim me të, është proceduar dhe ka vazhduar operacioni i bastisjes dhe kontrollit në rrugën “Fehmi Agani” në banesën e të dyshuarit T.T (33-vjeç), e cila dyshohet se ka qenë në shfrytëzim nga tre të dyshuarit e lartpërmendur.
Policia njofton se gjatë realizimit të kontrollit në banesë janë gjetur dhe sekuestruar dëshmitë/provat materiale si në vijim:
“Nëntëmbëdhjetë (19) qese me substancë të dyshuar narkotike të llojit kërpudha me peshë totale: 38.9 gram,
Pesë (5) qese me substancë të dyshuar narkotike të llojit TUSI (droge e re) me peshë totale: 26.6 gram
Nëntëmbëdhjetë (19) qese me 518 tableta në formë dhe ngjyra të ndryshme të dyshuara për narkotik të llojit EXTAZY me peshë: 245.9 gram
Shtatë (7) paketime me substancë të dyshuar narkotike të llojit Marihuanë me peshë: 502.4 gram
Një (1) cigare e mbështjellë me narkotik të llojit Marihuanë me peshë: 0.7gram
Njëzet e katër (24) paketime me substancë të dyshuar narkotike të llojit KETAMINË me peshë totale: 764.3 gram.
Nëntë (9) paketime me substancë të dyshuar narkotike të llojit MDMA me peshë: 228.1 gram
Shtatë (7) paketime me substancë të dyshuar narkotike të llojit SPEED me peshë: 118.1gram.
Dyzet e shtatë (47) tableta të dyshuara për narkotik të llojit LSD
Njëzet e tetë (28) qese të vogla me substancë të dyshuar narkotike të llojit KOKAINË me peshë totale: 15.2 gram.
Një (1) paketim me substancë të dyshuar narkotike e llojit Kokainë me peshë: 61.2 gram
Nëntëdhjetë e shtatë (97) copë VAPE (cigare Elektronike me përmbajte të kanabis sativa).
Një (1) armë pistoletë 7.62 M57, me një karikator
Një (1) armë pistoletë 7.62, me një karikator dhe shtatë (7) fishek
Një (1) llap top ACER
Një (1) llap top MAC BOOK
Dy (2) peshore digjitale constant per matje në sasi të vogla.
Një (1) paketë me qindra qese të thata për paketim,
Dy (2) automjete.
Një (1) motoçikletë.
Pesë (5) telefona”.
Sipas Policisë, vlera e përafërt e narkotikëve të konfiskuar me çmimin e tregut llogaritet mbi 30 mijë euro.
“Vlen të potencohet se shumica e substancave narkotikeve të konfiskuar janë droga sintetike me përmbajtje të materieve shumë të rrezikshme të cilat konsiderohen shume të dëmshme për shëndetin e njeriut. Në vendin e ngjarjes kanë dal Njësia K9 dhe njësia rajonale e Fornzikës në Prishtinë, për menaxhimin e provave materiale dhe procedurë të mëtejme”, thuhet në njoftim.
Bëhet e ditur se tre të dyshuarit në konsultim me prokurorin janë dërguar në qendrën e mbajtjes për 48 orë, përderisa rasti vazhdon të hetohet nga njësia e antidrogës dhe prokuroria kompetente në Prishtinë.
