Partia Demokratike ka reaguar sot menjëherë pas deklaratës së kryebashkiakut Veliaj lidhur me gjyqin për protestën e 8 dhjetorit.
PD shprehet se Veliaj mashtron kur deklaron se e ka fituar gjyqin. Sipas PD-së Gjykata Administrative ka shfuqizuar 7 aktet e kryebashkiakut Veliaj.
PD shkruan në deklaratën e saj se pretendimi i sotëm se ka fituar gjyqin është një riciklim mbetjesh e mashtrimesh të ulëta.
Deklarata e Partisë Demokratike:
Pretendimi sot i Erion Veliajt se paska fituar gjyqin me PD në lidhje me protestën e 8 dhjetorit, është një riciklim mbetjesh e mashtrimesh të ulëta. Sot, Gjykata Administrative vendosi shfuqizimin e të 7 akteve të Erion Veliajt, pra shfuqizoi pretendimet e tij sikur protesta popullore kishte shkaktuar 172 milionë lekë dëme në qytet. Gjykata e gjeti të paligjshëm dhe të pabazuar në prova, pretendimin e Veliajt, të bërë edhe publik me njoftimin që bëri me 8 Dhejtor 2015, ku ai kakariste se do ta detyronte PD-në të paguante cdo qindarkë. Në këtë mënyrë gjykata pranoi argumentimin e përfaqësuesve të PD se “dëmet”, ishin fryt i fantazisë së Kryetarit të Bashkisë Tiranë dhe se ato nuk kishin ndodhur në të vërtetë. Për më tepër, gjoba që Veliaj i vendosi protestës popullore, ishte një falsifikim i pastër, shkelje e rëndë ligjore, për të cilën ai duhet të ndiqet penalisht, pas kallëzimit që ka bërë polici bashkiak, të cilit iu falsifikua firma.
