PDK jo e plotë bllokon hyrjen në Qeveri

Partia Demokratike e Kosovës (PDK) ka vazhduar të enjten me aksionet e saj në shenjë kundërshtimi ndaj moskonstituimit të Kuvendit të Kosovës, mes të cilave ka dorëzuar edhe zyrtarisht një kërkesë për thirrjen e seancës konstituive nesër në orën 11:00.

Aksionet e së enjtes filluan me qëndrimin e disa deputetëve të saj para ndërtesës së Qeverisë, ku akuzuan kryeministrin në detyrë, Albin Kurtin, se po “uzurpon” institucionin dhe kërkuan që ai të kthehet në Kuvend.

Më vonë, deputetët e PDK-së u zhvendosën në objektin e Kuvendit, prej ku deputeti i kësaj partie, Përparim Gruda, njoftoi për dorëzimin e kërkesës edhe zyrtarisht.

Aksionet e PDK-së janë pjesë e presionit që kjo parti, bashkë me Aleancën, po ushtron për vazhdimin e seancës konstituive të Kuvendit dhe përfundimin e procesit të themelimit të legjislaturës së re.

Naim Jakaj nga Instituti i Kosovës për Drejtësi tha për Radion Evropa e Lirë të mërkurën se kërkesa për vazhdimin e seancës është “e drejtë”.

“Fakti që afati kushtetues prej 30 ditësh tashmë është shkelur nuk do të thotë se procesi duhet të ndalet. Përkundrazi, pas shkeljes së afatit, obligimi për konstituimin e Kuvendit vazhdon dhe deputetët duhet ta përfundojnë këtë proces pa vonesa të tjera”, tha Jakaj.

Sipas tij, Kushtetuta nuk parasheh shpërndarjen automatike të Kuvendit pas kalimit të afatit 30-ditor.

“Seanca duhet të vazhdojë pikërisht aty ku është ndërprerë dhe Kuvendi duhet të procedojë me zgjedhjen e kryetarit dhe të nënkryetarëve. Negociatat për zgjedhjen e presidentit janë proces tjetër kushtetues dhe nuk mund të vendosen si parakusht për konstituimin e Kuvendit”, tha Jakaj.

Ndërkohë, edhe përfaqësues të Lidhjes Demokratike të Kosovës (LDK) kanë insistuar në respektimin e afateve dhe procedurave kushtetuese, por nuk kanë marrë në pjesë në aksionet e këtyre dy ditëve. LDK-ja është partia e vetme që ka zhvilluar disa takime me LVV-në për një marrëveshje të mundshme.

Grupi parlamentar i kësaj partie ka thirrur takim sot.

Kosova mbetet pa Kuvend të konstituuar pas zgjedhjeve të parakohshme parlamentare të 7 qershorit.

Rezultatet e këtyre zgjedhjeve u certifikuan më 8 korrik, ndërsa afati 30-ditor për konstituimin e Kuvendit përfundoi më 7 gusht. Lidhur me këtë afat, 14 organizata joqeveritare iu drejtuar Gjykatës Kushtetuese të mërkurën.

Seanca konstituive ishte caktuar të niste më 6 gusht. Megjithatë, procesi u ndërpre pasi Kurti, në cilësinë e kryetarit të Lëvizjes Vetëvendosje, kërkoi kohë shtesë për diskutime me partitë politike lidhur me zgjedhjen e presidentit të ardhshëm.

Kurti argumentoi se konstituimi i Kuvendit pa një marrëveshje paraprake për presidentin do ta çonte vendin drejt zgjedhjeve të tjera të parakohshme.

Një ditë më parë, ministrja në detyrë e Drejtësisë, Donika Gërvalla, tha se kjo parti beson që afati për konstituim përfundon 30 ditë nga nisja e seancës.

PDK-ja dhe AAK-ja, në anën tjetër, kanë insistuar që Kuvendi të konstituohet dhe seanca të vazhdojë, duke e kundërshtuar kushtëzimin e këtij procesi me arritjen e një marrëveshjeje politike për presidentin.

Edhe pse afati 30-ditor për konstituimin e Kuvendit përfundoi më 7 gusht, seanca konstituive vazhdon të mbetet e hapur.

Më 8 gusht, deputetja e AAK-së, Time Kadrijaj, hodhi vezë drejt Kurtit gjatë seancës, pas së cilës kryesuesi i seancës, Avni Dehari, e ndërpreu atë.

Në ditët në vijim, përplasjet politike u zhvendosën sërish në Kuvend, me përplasje mes deputetëve të PDK-së dhe Aleancës, në njërën anë, dhe LVV-së, në anën tjetër, që eskaluan deri në shtyrje fizike të mërkurën.

Në qendër të përplasjes është kryesuesi i seancës konstituive, Avni Dehari, deputet i LVV-së, i cili po e drejton seancën në cilësinë e deputetit më të vjetër.

PDK-ja dhe AAK-ja kërkojnë që Dehari ta thërrasë dhe ta vazhdojë seancën, ndërsa Vetëvendosje ka kërkuar paraprakisht një marrëveshje politike mes partive.

PDK-ja pretendon se nuk ka arsye që konstituimi i Kuvendit të kushtëzohet me marrëveshjen për presidentin dhe se zgjidhja e krizës duhet të kërkohet brenda institucioneve.

Ndërkohë, kriza aktuale është vazhdim i një periudhe më të gjatë të paqëndrueshmërisë institucionale në Kosovë. Pas zgjedhjeve të mëparshme dhe krizës rreth zgjedhjes së presidentit, Kuvendi u shpërnda dhe vendi shkoi në zgjedhje të reja më 7 qershor.

Tash, edhe pas zgjedhjeve të reja, Kuvendi ende nuk është konstituuar, ndërsa partitë politike nuk kanë arritur marrëveshje për mënyrën e daljes nga ngërçi.

PDK-ja, ndërkohë, ka paralajmëruar vazhdimin e aksioneve për ta shtyrë përpara procesin e konstituimit.

Deputetë të Partisë Demokratike të Kosovës po qëndrojnë para hyrjes së ndërtesës së Qeverisë së Kosovës, duke kërkuar që seanca konstituive e Kuvendit të thirret dhe të mbahet gjatë ditës së sotme. Ata kanë paralajmëruar se do të vazhdojnë veprimet e tyre dhe, sikurse një ditë më parë, do të jenë të pranishëm edhe në Kuvendin e Kosovës.

Deputetja e Partisë Demokratike të Kosovës (PDK), Vlora Çitaku, ka deklaruar se qëndrimi i deputetëve të kësaj partie para objektit të Qeverisë nuk ka për qëllim ndonjë puç, por, sipas saj, rikthimin e funksionimit kushtetues të institucioneve.

Çitaku tha se kryeministri në detyrë, Albin Kurti, duhet të jetë në Kuvend dhe të angazhohet për konstituimin e tij dhe formimin e institucioneve të reja.

“Ne këtu jemi me një qëllim të vetëm: të kërkojmë rivendosjen e ligjit, Kushtetutës dhe demokracisë në vend”, deklaroi Çitaku para mediave.

Ajo akuzoi Kurtin se po qëndron në objektin e Qeverisë pa mbikëqyrje parlamentare, duke e cilësuar këtë situatë si uzurpim të institucioneve.

“Këto zyra janë të uzurpuara nga një deputet. Dhe po aq sa ka të drejtë ai të jetë aty, po aq kemi të drejtë edhe ne”, tha Çitaku.

Duke iu referuar qëndrimit të deputetëve të PDK-së para Qeverisë, ajo theksoi se qëllimi nuk është marrja e institucioneve me forcë.

“Nuk jemi ne këtu me bërë puç! Ne jemi këtu me i thënë Albin Kurtit: Eja në Kuvend, shumicën e ke, ndërroje qeverinë dhe ecim tutje”, u shpreh ajo.

Çitaku ngriti gjithashtu pikëpyetje mbi vendimet që, sipas saj, janë marrë nga Qeveria pa mbikëqyrje parlamentare.

“Kush janë ata që marrin vendime, me çfarë mandati, këtu në ndërtesë të Qeverisë?”, pyeti ajo.

Deputetja e PDK-së tha se ata do të qëndrojnë para objektit të Qeverisë derisa Kurti të paraqitet aty, ndërsa paralajmëroi edhe veprime të tjera politike.

“Do të rrimë këtu, do të presim sa të vjen ai që i thotë vetes Kryeministër”, deklaroi Çitaku.

Ajo bëri të ditur se PDK-ja do të rikthehet në Kuvend për të përsëritur kërkesën për thirrjen e një seance dhe për të ndërmarrë aktivitete të tjera, të cilat tha se do t’i bëjnë publike.

“Jemi këtu me ia kujtuar detyrën. Nuk kemi me u ndalur”, përfundoi Çitaku.

Edhe seputeti i PDK-së, Enver Hoxhaj, ka kritikuar situatën politike në Kosovë, duke e akuzuar Qeverinë në detyrë për tejkalim të kompetencave dhe shkelje të Kushtetutës.

Hoxhaj tha se pas tri palë zgjedhjeve nacionale, vendi ndodhet ende pa institucione të konsoliduara, ndërsa sipas tij, Qeveria dhe ministrat kanë qëndruar për një periudhë të pazakontë në detyrë.

“Ky zotëri nuk është kryeministër, është një deputet zaptues, një deputet uzurpator i cili e ka uzurpuar zyrën e Kryeministrit”, deklaroi Hoxhaj, duke iu referuar Albin Kurtit.

Ai theksoi se edhe nga përvoja e tij si ministër, pas certifikimit si deputet kishte lënë detyrën ministrore dhe kishte vazhduar vetëm si deputet i Kuvendit.

Partia Demokratike e Kosovës ka dalë me një njoftim, ndërsa disa prej deputetëve të saj po qëndrojnë para ndërtesës së Qeverisë, në pritje të kryeministrit në detyrë, Albin Kurti.

Përmes një postimi në Facebook, PDK ka bërë të ditur se deputetët e saj janë para Qeverisë, duke paralajmëruar vazhdimin e veprimeve politike kundër zhvillimeve të fundit institucionale.

“Republikë – Kushtetutë! Sot jemi para Qeverisë, krahas veprimeve të tjera që po ndërmarrim. Nuk do të ndalemi deri në rikthimin e rendit kushtetues dhe fitoren e Republikës!”, thuhet në njoftimin e PDK-së.

Ndërkohë, PDK pritet të mbajë edhe një konferencë për media, ku pritet të japë më shumë detaje lidhur me veprimet e saj

Disa deputetë të Partisë Demokratike të Kosovës (PDK) kanë mbërritur para ndërtesës së Qeverisë së Kosovës, ku pritet të mbahet konferenca për media e paralajmëruar nga kjo parti.

Në mesin e tyre është edhe deputeti Artan Behrami, i cili ka publikuar një fotografi në rrjetin social Facebook, duke bërë të ditur se ndodhet para ndërtesës së Qeverisë.

Përmes postimit të tij, Behrami ka kërkuar që sot të thirret seanca konstituive e Kuvendit të Kosovës.

“Mirëmëngjes! Të thirret seanca dhe të konstituohet Kuvendi!”, ka shkruar ai.

PDK ka njoftuar se konferenca për media pritet të mbahet pak pas orës 07:30.