Serbia si shtet artificial dhe kufijtë e Kosovës

Opinione

Serbia si shtet artificial dhe kufijtë e Kosovës

Nga: Melihate Tërmkolli Më: 26 nëntor 2022 Në ora: 13:31
Melihate Tërmkolli

Në rrethana optimale askush më shumë se shiptarët nuk do të duhej të ishte më i interesuar për bisedime dhe rivendosjen e çështjes së kufijve. Kurdo që mund të shtrohet kjo çështje, baza e saj është në Kongresin e Berlinit ose thënë më saktë në zbatimin e plotë ose revidimin e vendimeve të Kongresit të Berlinit. Vetëm mbi këtë bazë mund ta bisedohet kjo temë kurdo që janë të gatshëm të gjithë faktorët relevantë.

Si pasojë e këtyre vendimeve, Shqipëria edhe Kosova janë shtetet e vetme në Ballkan që përgjatë gjithë kufijve të tyre kufizohen me shqiptarë dhe territore shqiptare.

Në Ballkan pra, askush më shumë se shqiptarët nuk ka interes e argumente të flasë e të hapë çështje të kufijve, për aq sa ka vlerë forca e argumenteve e jo argumenti i forcës.

Është e ditur, ose së paku Evropa dhe Serbia në veçanti, e dijnë se shtetet e Ballkanit Perëndimor janë shtete të ndërtuara në masën më të madhe mbi territorin (tokat) e shqiptarëve. Gati gjysma e territorit të Serbisë së sotme është territor shqiptar, ndërsa si shtet u formua dhe u njoh nga fuqitë e mëdha të kohës vetëm pas aneksimit të territorit shqiptar përmes spastrimit etnik e gjenocidit më 1877/78, dhe si e tillë, ajo nuk mund të kuptohet e të njihet ndryshe veçse si një shtet artificial.

Kongresi i Berlinit i kishte njohur dhe pranuar Serbisë territorin shqiptar prej 10.972km2 i njohur si Sanxhaku i Nishit prej nga shqiptarët ishin dëbuar dhunshëm përmes masakrave e spastrimit etnik por njëkohësisht Kongresi ua kishte njohur të drejtën shqiptarëve që të kthehen në shtëpitë dhe pronat e tyre, pra në vendin e tyre. Për këtë qëllim madje ishte formuar edhe një Komision ndërkombëtar. Që nga ajo kohë Serbia asnjëherë nuk e përfilli dhe nuk e zbatoi atë vendim duke e penguar edhe Komisionin që të kryejë punën e tij.

Në çdo rast, zbatimi i vendimeve ndërkombëtare nga Serbia, duhet të fillojë nga këtu.

Në raport me Kosovën e shqiptarët, pra Serbia që nga ajo kohë nuk ka pranuar dhe nuk ka zbatuar asnjëherë asnjë vendim ndërkombëtar që ka qenë sado pak në interesin e shqiptarëve. E tillë ka mbetë edhe deri në ditët e sotme. Ka refuzuar ta pranojë Marrëveshjen e Rambujesë, ka refuzuar Marrëveshjen e Ahtisarit, ka refuzuar dhe po e konteston edhe Vendimin e GJND dhe ka refuzuar të zbatojë pothuaj të gjitha marrëveshjet që i ka nënshkruar gjatë bisedimeve 2011-2018. Politika serbe pra nuk lidhet vetëm me regjimin aktual por ka të bëjë me politikat e saj shtetërore anti-shqiptare të ndërtuara së bashku me Kishën Ortodokse Serbe dhe Akademinë Serbe të Shkencave e Arteve, përmes shumë elaborateve me të cilat ndjekin një linjë politike sllave- ortodokse me qendër në Kremlin.

Që nga 1912 kur Serbia e aneksoi edhe Kosovën e sotme e deri më 1999, e ka konsideruar atë në të gjitha trajtat dhe format e një kolonie të saj.

Nëse kjo botë (demokratike!), ende respekton dhe njeh gënjeshtrat, përrallat e mitet e rrejshme serbe të para mbi 600 viteve, si bazë e vendosjes së politikave serbe në Ballkan e në veçanti në raportet Kosovë-Serbi, pse nuk duhet ta pranojë dhe ta respektojë të vërtetën e vet dhe realitetin për shqiptarët prej pak më shumë se 100 viteve?!

Evropa, vetëm me rolin prijës e vendimtar të SHBA-ve e korrigjoi përgjysmë gabimin dhe borxhin ndaj Kosovës e shqiptarëve. Ka mbetë për ta korrigjuar edhe gjysmën tjetër, në vend të presioneve që i bëhen Kosovës për ta prishë e për ta lënë gjysmë edhe këtë gjysmë që është tani.

Të nderuar lexues të gazetës “Bota sot”, komentet që përmbajnë fyerje, ofendime dhe sharje nuk lejohen në portal. Andaj, komentet e juaja do të kalojnë në filtra për aprovim dhe të tillat që përmbajnë gjuhë që nuk përkon me rregullat, nuk do të aprovohen. Ju faleminderit.
Sot mund të lexoni Shfletoni kopertinat