Një shënim që merrte përgjegjësinë për rrëmbimin e ish-kryeministrit italian Aldo Moro është nxjerrë në ankand pavarësisht akuzave se shitja ishte me shije të dobët. Moro u rrëmbye në vitin 1978 nga grupi gueril komunist Brigadat e Kuqe, të cilët e akuzuan atë për bashkëpunim me fuqitë “imperialiste” në fletushkën me dy faqe.
Më pas ai u vra nga grupi. Shtëpia e ankandit Bertolami e Romës e shiti dokumentin për 26,000 euro ditën e enjte. Çmimi ishte dukshëm mbi vlerësimin fillestar të bërë mbi shënimin, i cili varionte nga 1,300 euro deri në 1,700 euro. Në dokumentin që është vendosur logoja e Brigadës së Kuqe thuhet se “një celulë e armatosur e Brigadave të Kuqe rrëmbeu dhe burgosi në një burg të popullit Aldo Moro, president të Kristian Demokratëve”.
Në dokument akuzohet politikani i qendrës së djathtë për përfshirje në “programe kundër-revolucionare të kërkuara nga borgjezia imperialiste”. Shitja, e cila vazhdonte prej disa javësh, është dënuar nga një mori figurash të njohura në të gjithë vendin. Deputeti i Partisë Demokratike, Filippo Sensi shkroi në Twitter se ishte “shumë i trishtuar” kur pa ankandin e një “rekordi të tillë të dhimbshëm”.
Gazetari Mario Calabresi, babai i të cilit gjithashtu u vra nga kryengritësit e majtë në vitin 1972 ndërsa shërbente si komisar policie në Milano, gjithashtu dënoi shitjen raportoi “BBC”. “Këto faqe pikojnë gjak, nuk blihen e shiten, e nuk bëhen sende të një koleksionisti”, tha ai.
Ai shtoi se vendi më i përshtatshëm për dokumentet ishte në një muze ose në një memorial “për të na kujtuar barbarinë e terrorizmit”. Një ish-anëtar i Brigadës së Kuqe, Paolo Persichetti ka hedhur dyshime mbi vlerësimin e dokumentit duke pretenduar se ai nuk është origjinal, por një kopje dhe qindra prej tyre ekzistojnë në arkivat shtetërore.
Zoti Persichetti shkroi në një postim të fundit në blog se ka “një ndryshim të qartë” midis shënimit origjinal të dërguar nga grupi i tij dhe atij të vendosur në ankand ditën e mërkurë. Ish-udhëheqësi i Kristian Demokratëve të Italisë, Moro ishte figura dominuese në politikën italiane kur u sulmua nga guerilasit e Brigadave të Kuqe ndërsa udhëtonte me makinën e tij nëpër Romë. Pesë truproja u qëlluan për vdekje kur ai u kap.
Trupi i tij u zbulua më vonë në bagazhin e një makine të parkuar në Romë, 55 ditë pas rrëmbimit të tij, i mbushur me plagë plumbash. Vrasja ishte aksioni i profilit më të lartë të grupit dhe ndodhi gjatë të ashtuquajturave “Vitet e Plumbit” në Itali, ku grupet e së majtës ekstreme dhe të ekstremit të djathtë ishin përgjegjëse për një valë dhune që zgjati përgjatë viteve 1970 dhe 1980. Kjo nuk është hera e parë që dokumentet në lidhje me rrëmbimin e Moro janë shitur në ankand.
Në vitin 2012, shtëpia e ankandit Bolaffi në Milano shiti 17 fletëpalosje propagandistike dhe deklarata të lëshuara nga Brigadat e Kuqe duke përfshirë famëkeqin “Komunikimi numër 6”, i cili shpalli dënimin e tij me vdekje.
