Inaugurimi i Pallatit të Drejtësisë ishte bërë në vitin 2015. Që nga ajo kohë, është trashëguar një problem goxha i madh për punëtorët e zyrtarët që punojnë këtu.
Për më shumë se 7 vite nuk ka oksigjen të mjaftueshëm brenda objekteve.
Si rezultat i kësaj, shumë zyrtarë, prokurorë e gjykatës janë alivanosur.
E rast i tillë ka ndodhur gjatë së enjtes, ku një zyrtare e prokurorisë themelore është alivanosur.
Se sa e dëmshme është kjo për punëtorët e këtij institucioni tregon edhe avokati Yll Zekaj.
Zekaj tregon se edhe pas shumë protestave dhe iniciativave gjendja s’është përmirësuar.
Të shqetësuar për shëndetin e tyre janë edhe zyrtarët e Gjykatës Themelore në Prishtinë.
Në një përgjigje, zëdhënësja e këtij institucioni, Mirlinda Gashi ka thënë se nuk janë në dijeni se ku qëndron problemi.
Mirëpo thotë se për këtë duhet të bëhet zgjidhje sa më shpejtë nga Ministria e Punëve të Brendshme.
Përpos problemit me oksigjen, as ashensorët nuk funksionojnë siç duhet në Pallatin e Drejtësisë.
