Pas propozimit të Bedri Hamzës, kandidat i PDK-së për kryeministër të Kosovës, kryetari i kësaj partie Memli Krasniqi tha se ata që duhet të frikësohen janë Albin Kurti dhe partia e tij.
Kësaj deklarate i janë kundërpërgjigjur nga Vetëvendosja.
Deputeti Artan Abrashi tha se nuk brengosen, e as nuk ndjehen të shqetësuar për këtë.
Ai tha se gara do të zhvillohet për vendin e dytë, pasi sipas tij Albin Kurti do të jetë përsëri në Kryeministër i Kosovës.
“Mirëpo në kontekstin e garës se si do të zhvillohet kurdo që vijnë ato, pak ka rëndësi kandidatët që i qet opozita për shkak që gara do të zhvillohet për vendin e dytë. Deklaroj që kryeministër i ardhshëm i Republikës së Kosovës është në mënyrë të pakontestueshme do të jetë Albin Kurti. Si do që të jetë është vendim i tyre, kanë menduar që mund të hyjnë në garë me z.Hamza, nuk ka absolutisht diçka që neve na brengosë ose na shqetëson, përkundrazi i dëshirojmë suksese, punë të mbarë”, u shpreh Abrashi.
Zgjedhjet parlamentare pritet të mbahen vitin e ardhshëm në Kosovë.
Së fundmi, opozita ka intensifikuar kërkesat për zgjedhje të reja, duke kërkuar dorëheqjen e kryeministrit Albin Kurti. Por Kurti ka thënë se nuk sheh arsye të japë dorëheqje, ndërsa ka rekomanduar opozitën që ta shpërbëjë Kuvendin e më pas të shkohet në zgjedhje.
