Ministrja e Ekonomisë, Artane Rizvanolli, në ankandin elektronik për parkun solar i cili po mbahet në Rahovec, tha se ky ankand është i pari proces i tillë konkurrues në Kosovës, e që do të vendosë një gurthemel në sektorin e ri të energjisë.
Në fjalën e saj hyrëse, Rizvanolli tha se qëllimi i këtij projekti ka të bëjë që ekonomia e shkallës të garantojë një çmim sa më të volitshëm për qytetarët e vendit, teksa shtoi se po ashtu kanë krijuar kushte tërheqëse për investitorët përmes përparësive të këtij ankandi.
“Ankandi diellor prej 100 MW që po përmbyllim sot, është i pari proces i tillë konkurrues në Kosovë, e që vendos një gurthemel të sektorit tonë të ri të energjisë. Qëllimi ynë ishte që të kemi një projekt të madh, po ashtu të sigurohemi që ekonomia është shkallës garanton një çmim sa më të volitshëm për qytetarët tonë. Për të krijuar kushte tërheqëse për investitorët, kemi ofruar një sërë avantazhe kritike përmes këtyre përparësive të madhësisë së projektit, kemi bërë një projekt tërheqës për investitorët e përmes eliminimit të nevojës për të hulumtuar e siguruar tokë, jemi siguruar që procesi të lehtësohet e konkurrenca hapet maksimalisht për sa më shumë kompani ndërkombëtare edhe nëse ato s’kanë lidhje paraprake me Kosovën”, deklaroi Rizvanolli.
Po ashtu, ministrja vlerësoi që muaji mars ka qenë fantastik për sektorin e energjisë në Kosovë, teksa përmendi lansimin e bursës shqiptare të energjisë elektrike si dhe themelimin e korporatës për ruajtjen e energjisë.
“Ky ka qenë një muaj fantastik për sektorin e energjisë në Kosovë, e kemi lansuar bursën shqiptare të energjisë elektrike ALPEX, e kemi themeluar korporatën e ruajtjes së energjisë. Ministria e Financës, Punës dhe Transfereve, ka përfunduar marrëveshjet e financimit dhe ka nënshkruar marrëveshjen për zhvillim projektit mes bankës gjermane dhe KEK-ut” , theksoi tutje Rizvanolli.
Ndër të tjerash, Rizvanolli u shpreh optimiste që shumë shpejt Kuvendi do ta miratojë ligjin e parë të Kosovës për burime të ripërtëritshme të energjisë.
